आणविक निशस्त्रीकरणको मुद्दा छाडे ट्रम्पसँग वार्तामा बस्न किम तयार

६ असोज, काठमाडौं । उत्तर कोरियाका सर्वोच्च नेता किम जोङ उनले अमेरिकाले आफ्नो आणविक हतियार त्याग्न दबाब नदिए वार्तामा बस्ने बताएका छन् ।

उत्तर कोरियाले आणविक निशस्त्रीकरण गर्नुपर्ने भनेर अमेरिकाले बेतुकको तर्क गरिरहेको बताउँदै नेता किमले शान्तिपूर्ण सहअस्तित्व स्वीकार गर्न अपील गरे ।

उत्तर कोरियाली संसद्‌मा किमले भनेका छन्, ‘यदि अमेरिकाले हामीलाई आणविक निशस्त्रीकरण गर्ने बेतुकको सपना त्याग्छ र वास्तविकता स्वीकारेर शान्तिपूर्ण सहअस्तित्व चाहन्छ भने हामी अमेरिकासँग वार्तामा नबस्ने कुनै कारण छैन ।’

साथै किमले अमेरिकी राष्ट्रपति डोनाल्ड ट्रम्पसँगको भेटको सम्झना पनि ताजै रहेको बताए ।

‘व्यक्तिगतरूपमा मलाई अझै पनि अमेरिकी राष्ट्रपति डोनाल्ड ट्रम्पसँगको भेटको मीठो सम्झना छ,’ संसद्‌मा आइतबार किमको भनाइ उद्धृत गर्दै दक्षिण कोरियाली सरकारी समाचार संस्था केसीएनएले लेखेको छ ।

गत महिना अमेरिकी राष्ट्रपति ट्रम्पले दक्षिण कोरियाली राष्ट्रपति ली जे–म्युङले किम जोङ उनसँग भेट इच्छुक रहेको बताएका थिए ।

ट्रम्पले किमको बहिनीपछि आफूले मात्र उनलाई नजिकबाट चिनेको समेत दाबी गरेका थिए ।

ट्रम्पले यसै वर्ष अर्थात् सन् २०२५ भित्रै भेट हुन सक्ने समेत बताएका थिए ।

ट्रम्पको उक्त भनाइ पछि उत्तर कोरियाली नेता किम जोङ उनले निशर्त भेटको सम्भावनाको संकेत गरेका हुन् ।

ट्रम्पको पहिलो राष्ट्रपतीय कार्यकालमा किमसँग तीन पटक उच्च–स्तरीय शिखर बैठक भएको थियो ।

तर, अमेरिकाले आणविक निशस्कीरणको अडान छाड्दा ट्रम्प–किमबीच भएका शिखर वार्ता निष्कर्षविहीन रह्यो ।

अमेरिकाले उत्तर कोरियामा आणविक निशस्त्रीकरणको माग गर्दै आएको छ ।

२० अघिदेखि संयुक्त राष्ट्रसंघको कठोर प्रतिबन्धका बीच उत्तर कोरियाले आफ्नो आणविक र मिसाइल कार्यक्रमलाई निरन्तर अघि बढाइरहेको छ ।

उत्तर कोरियाले हरेक वर्ष १५ देखि २० आणविक हतियार थपिरहेको दक्षिण कोरियाली अधिकारी बताउँछन् ।

आइतबार संसद्को सम्बोधनमा किमले राष्ट्रसंघीय प्रतिबन्धले आफ्नो मुलुकलाई अझ बलियो र लचिलो बनाएको दाबी गरेका छन् । उत्तर कोरियामा २ करोड ६० लाख जनसंख्याले खाद्य संकटको सामना गरिरहेको प्रतिवेदनहरूले देखाउँछ ।

प्रतिबन्ध हटाउने सपना देख्दा शत्रुहरूसँग केही साटासाट गर्नुपर्ने भन्दै नेता किमले भनेका छन्, ‘त्यस्तो अवस्थामा वार्ता कहिल्यै हुनेछैन, अनन्तकालसम्म हुनेछैन ।’