मौसम पूर्वानुमानसम्बन्धी पोस्टमा हरिहरले किन माफी मागे ?

News Summary

Generated by OK AI. Editorially reviewed.

ज्योतिष तथा अभिनेता हरिहर अधिकारीले मौसम पूर्वानुमानसम्बन्धी विवादित फेसबुक पोस्ट हटाएर माफी माग्नुभएको छ।
सरकारले आगामी तीन दिनसम्म भीषण वर्षा हुनसक्ने चेतावनी दिइरहँदा हरिहरले पूर्णिमासम्म अनिष्ट नहुने अभिव्यक्ति दिनुभएको थियो।
हरिहर अधिकारीले साउनको दोस्रो साता नासाले संस्कृत भाषाबाट अन्तरिक्षमा सम्पर्क गर्ने अभिव्यक्ति दिएर पनि ट्रोल बनेका थिए।

काठमाडौं । ज्योतिष तथा अभिनेता हरिहर अधिकारी अहिले चर्चामा छन् । आलोचना बढ्दै गएपछि उनले मौसम पूर्वानुमान सम्बन्धी एक पोस्ट फेसबुकबाट हटाउन बाध्य भए ।

पूर्णिमा नजिक आइरहेकाले अहिलेको प्रतिकूल मौसमले ठूलो अनिष्ट नहुने उनले बताएका थिए । उनको यो अभिव्यक्तिलाई लिएर चौतर्फी आलोचना भयो । सामाजिक सञ्जाल प्रयोगकर्ता धेरैले मौसम ज्योतिषीय भन्दा विज्ञानसँग सम्बन्धित विषय रहेको कुरा हरिहरलाई बताएका छन् ।

यतिबेला भने पुरानो पोस्ट हटाउँदै माफी मागेका छन् । ‘मौसम सम्बन्धी हिजो लेखिएको कुराप्रति क्षमाप्राथी छु । सबैजना आ-आफ्नो स्थानमा सुरक्षित रहनुहोस्’ उनले लेखेका छन् ।

सरकारले भने अबको ३ दिनसम्म भीषण वर्षा हुनसक्ने भन्दै नागरिकलाई सतर्कता रहन भनिसकेको छ । यस्तोमा हरिहरले स्टाटसमार्फत पूर्णिमासम्म केही अनिष्ट नहुने बताएका थिए ।

२०७९ साल साउनको दोस्रो साता पनि उनी यस्तै एक अभिव्यक्तिले ट्रोल बनेका थिए । उनले त्यतिबेला नासाले संस्कृत भाषाबाट अन्तरिक्षमा सम्पर्क गर्ने बताएका थिए ।

फिल्म अभिनेता तथा निर्माता अधिकारी फिल्मबाहेकका ज्योतिषीय अभिव्यक्तिले बेला-बेलामा चर्चामा आइरहन्छन् ।