पूर्वसूचना र बुझाइमा एकरुपताले विपद्सँग लड्न सफल भयौं : महानिर्देशक जोशी

१९ असोज, काठमाडौं । जल तथा मौसम विज्ञान विभागका महानिर्देशक कमलराम जोशीले पूर्वसूचना, बुझाइमा एकरुपता र समन्वयात्मक रूपमा एकद्वार प्रणालीबाट काम गरेकाले विपद् प्रतिकार्यमा सफलता मिलेको बताएका छन् ।

मौसमजन्य विपद्को पछिल्लो अवस्थाबारे न्यूज एजेन्सी नेपालसँग कुरा गर्दै जोशीले यस वर्ष मनसुनको अन्त्यतिर विपद्को सामना गर्नुपरे पनि विगतको तुलनामा कम जनधनको क्षति भएको निष्कर्ष सुनाएका हुन् ।

‘यस वर्ष मनसुनको अन्त्यतिर आएर जल तथा मौसम विपद्को हामीले सामना गर्नुपरेको छ’ उनले भने, ‘जल तथा मौसम विज्ञान विभागको पूर्वानुमान, पूर्वसूचनाको बुझाइमा एकरुपता र समन्वयात्मक रूपमा एकद्वार प्रणालीबाट काम गर्नसक्दा विगतको तुलनामा यस्ता प्रकारका घटना भन्दा जनधनको क्षति कम भएको अनुमान छ ।’

जोशीले सबै तथ्याङ्क आउन बाँकी भए पनि समग्रमा विपद्सँग लड्न सफल भएको निष्कर्ष सुनाए ।

‘२७ अक्टोबरमै १८,१९ र २० गते यस्तो हुन्छ भनेर पूर्वानुमान र पूर्वसूचना विभागबाट जारी भइसकेको थियो’ उनले भने, ‘समयमै सूचना पुर्‍याउन सकेको कारणले गर्दा ठूलो क्षति भएन । यस वर्ष हामी यस वर्षको विपद्सँग लड्न सफल भयौँ ।’

उनले पूर्वानुमान एक पटक मिल्यो भन्दैमा हौसिनुपर्ने र मिलेन भन्दैमा निराश हुनुपर्ने कारण नरहेको बताए ।