फागुन २१ को चुनावमा हिमाली क्षेत्रमा हिमपातको चिन्ता, हेलिकोप्टरको प्रबन्ध गर्ने तयारी

११ कात्तिक, काठमाडौं। निर्वाचन आयोगले आगामी फागुन २१ को प्रतिनिधि सभा सदस्य चुनावमा हिमाली क्षेत्रमा हिमपात हुन सक्ने भनेर त्यसअनुसारको तयारी गर्न खोजेको छ । यसका लागि मौसमविदहरूको सल्लाह लिइएको छैन।

सामान्यतया फागुन महिनामा हिमपात हुने गरेकोले त्यसअनुसारको तयारी गर्न खोजिएको आयोगले जनाएको छ । तयारी अन्तर्गत चुनावको लागि हिमाली क्षेत्रमा हेलिकोप्टरको प्रबन्ध गरिंदैछ ।

तयारी अन्तर्गत निर्वाचन आयोगले चुनावको लागि साढे सात अर्ब निर्वाचन खर्च लाग्ने अनुमानसहितको बजेट तयार पारेको छ ।

बजेटमा सामग्री खरिद गर्नेबाहेक आयोगले केही रकम आकस्मिक व्यवस्थापन शिर्षकमा राख्न खोजेको छ । हेलिकप्टरबाट कर्मचारी खटाउने र निर्वाचन सामग्री ढुवानी गर्नुपर्ने अवस्थालाई ख्याल गरेर आयोगले आकस्मिक व्यवस्थापन शिर्षकमा बजेट राख्न खोजेको हो ।

खासगरी हिमाली क्षेत्रमा मौसमका कारणले निर्वाचन गराउन कठिन हुने अनुमानसहित यस्तो गर्न लागिएको आयोगले जनाएको छ । मौसम खुलेका बेला कर्मचारी पठाउने गरी हेलिकोप्टरको व्यवस्था गर्ने र हेलिकोप्टरबाट निर्वाचन सामग्री ढुवानी गर्ने गरी बजेट अनुमान गरिएको हो ।

निर्वाचन आयोगले बजेट निर्माण गर्दै गर्दा निर्वाचनका लागि आवश्यक सामग्रीहरूको सूची समेत तयार गर्दैछ ।

चाडपर्व सकिएकाले अब आवश्यक सामग्री किन्न सुरू गर्ने पनि आयोगको तयारी छ। यसका लागि आयोगले अर्थ मन्त्रालयसँग छलफल गरिरहेको छ । यसअघि नै रहेका सामग्री समेत प्रयोग गर्ने गरी आयोगले थप आवश्यक सामग्री खरिद गर्न खोजेको जनाएको छ ।