नक्कली कागजात मार्फत विदेश जान खोज्ने अफलोड, २२६ पासपोर्ट बरामद

News Summary

Generated by OK AI. Editorially reviewed.

अध्यागमन कार्यालयले नक्कली कागजात बनाएर विदेश जान खोज्ने २२६ व्यक्तिहरूलाई पछिल्लो तीन महिनामा अफलोड गरेको छ।
अफलोड गरिएका २२६ पासपोर्टमध्ये १०६ फिर्ता गरिएका छन् भने १२० अनुसन्धानका लागि सीआईबी र मानव बेचबिखन अनुसन्धान ब्यूरोमा पठाइएको छ।
भिजिट भिसामा विदेश जान न्यूनतम ५ सय अमेरिकी डलर, दुईतर्फी टिकट, होटल बुकिङ अनिवार्य गर्ने प्रावधान खारेज गरिएको छ।

१४ कात्तिक, काठमाडौं । नक्कली कागजात बनाएर विदेश जान खोज्ने व्यक्तिहरूलाई अध्यागमन कार्यालयले अफलोड (फिर्ता) गरेको छ ।

पछिल्लो तीन महिनाको अवधिमा अफलोड गरिएकाहरूबाट २२६ राहदानी (पासपोर्ट) बरामद गरिएको छ ।

अफलोड गरिएकाहरूलाई भने नियन्त्रणमा नलिई उनीहरूका शंकास्पद कागजात मात्रै नियन्त्रणमा लिएर अनुसन्धान गर्ने गरिएको अध्यागन विभागले बताएको छ ।

पछिल्लो तीन महिनामा बरामद भएका २२६ पासपोर्टमध्ये १०६ पासपोर्ट छानबिन गरेर सम्बन्धित व्यक्तिलाई फिर्ता गरिएको छ ।

बाँकी १२० पासपोर्ट भने अनुसन्धानका लागि भन्दै केन्द्रीय अनुसन्धान ब्यूरो (सीआईबी) र मानव बेचबिखन अनुसन्धान ब्यूरोमा पठाइएको विभागका महानिर्देशक रामचन्द्र तिवारीले बताए ।

यसअघि भिजिट भिसामा जाने नागरिकलाई ६ बुँदे प्राधवान कायम रहेकोमा त्यसैलाई आधार बनाउँदै अनियमितता हुने गरेको भन्दै अहिले भने त्यो प्रावधान खारेज गरिएको छ ।

यसअघि भिजिट भिसामार्फत् विदेश जानेका हकमा न्यूनतम ५ सय अमेरिकी डलर, दुईतर्फी हवाई टिकट, अग्रिम होटल बुकिङ वा स्पोन्सरको प्रमाण अनिवार्य गरिएको थियो ।

यसैलाई कारण देखाउँदै बिचौलियाहरूले रकम असुल्ने गरेको र भिजिट भिसामा जानेहरू थप पीडित हुने गरको भन्दै त्यो प्रावधान खारेज गरिएको विभागले बताएको छ ।