क्यूएफएक्सले दियो ‘परान’ लाई सुपरहिटको मान्यता

News Summary

Generated by OK AI. Editorially reviewed.

क्यूएफएक्सले नीर शाह स्टारर फिल्म 'परान' लाई दोस्रो सातामा पनि सुपरहिट घोषणा गरेको छ।
फिल्मले आगामी सप्ताहन्तमा १२ देखि साढे १२ करोड रुपैयाँ कमाइ गर्ने प्रक्षेपण गरिएको छ।
क्यूएफएक्सका १६ हल र ३८ पर्दामा 'परान' ले घरेलु बक्सअफिसमा उछाल कमाइ गरिरहेको छ।

काठमाडौं । मुलुकको ठूलो मल्टिप्लेक्स चेन क्यूएफएक्सले प्रदर्शनरत फिल्म ‘परान’ लाई सुपरहिट घोषणा गरेको छ । पहिलो सातामा ‘सुपरहिट’को संज्ञा पाउनु नयाँ नभएपनि दोस्रो सातामा भने विरलै हुने कुरा हो ।

दोस्रो सातामा नीर शाह स्टारर फिल्मले घरेलु बक्सअफिसमा उछाल कमाइ गरिरहेको देखिएको छ । फिल्मले आगामी सप्ताहन्तमा १२ देखि साढे १२ करोडसम्मको कमाइ गर्ने प्रक्षेपण गरिएको छ ।

अहिलेको गति कायम रहे, यो फिल्म केही दिनमा २०८२ सालमा सर्वाधिक कमाउने फिल्म बन्नेछ ।

चेन अन्तर्गतका हलमा भएको कमाइको आधारमा दीपक आचार्य काकु निर्देशित फिल्मलाई ‘सुपरहिट’ ट्याग दिइएको क्यूएफएक्सको माउ कम्पनी टीम क्वेस्टले जनाएको छ ।

आफ्ना हलमा कुनै फिल्मले सप्ताहन्त (विकेन्ड)मा १ करोड ५० लाख रुपैयाँ ग्रस कमाए त्यसलाई ‘ब्लकबस्टर’ र कुनै फिल्मले साताभर सोही बराबरको कमाइ गरे त्यसलाई ‘सुपरहिट’ घोषणा गर्ने क्यूएफएक्सको मापदण्ड छ ।

तर, कुनै पनि फिल्मले अहिलेसम्म ब्लकबस्टरको मापदण्ड हासिल गर्न सकेका छैनन् ।

हलमा तोकिएको कमाइ पुरा गरेमा अटोमेटिकरुपमा वेबसाइटमा ट्याग देखापर्ने टिम क्वेस्टको भनाइ छ । अहिले देशभर क्यूएफएक्सका १६ हल र ३८ पर्दा छन् ।

पछिल्लो समय अन्य दुई नेपाली फिल्महरू ‘जेरी अन टप’ र ‘जारी २’ ले क्यूएफएक्सबाट सुपरहिटको मान्यता पाएका छन् ।