गगनले पार्टी प्रवेश गराएको भोलिपल्टै जसपा नेपालमै फर्किए वडाध्यक्ष गुप्ता

News Summary

Generated by OK AI. Editorially reviewed.

सर्लाहीको गोडैता नगरपालिका–५ का वडाध्यक्ष प्रकाश प्रसाद गुप्ताले नेपाली कांग्रेस छोडेर जनता समाजवादी पार्टी नेपालमा फर्किएको घोषणा गरेका छन्।
गुप्ताले आफू सुरुदेखि जसपामा रहेको र आगामी निर्वाचनमा पनि जसपालाई सहयोग गर्ने प्रतिबद्धता व्यक्त गरेका छन्।
हिजो गगन थापाले कांग्रेसमा भित्र्याएका चार जना वडाध्यक्षमध्ये गुप्ता पुनः जसपामा फर्किएका छन्।

१५ माघ, सर्लाही । हिजो (बुधबार) मात्र नेपाली कांग्रेसका सभापति गगन थापाले पार्टीमा भित्र्याएका सर्लाहीको गोडैता नगरपालिका–५ का वडाध्यक्ष प्रकाश प्रसाद गुप्ता आफ्नै पूरानो पार्टी जनता समाजवादी पार्टी (जसपा) नेपालमा फर्किएका छन् ।

जसपाबाट निर्वाचित वडाध्यक्ष गुप्ताले आज आफू कांग्रेस परित्याग गरी पूरानै पार्टीमा फर्किएको घोषणा गरेका हुन् । उनले आगामी निर्वाचनमा पनि जसपा नेपाललाई नै सहयोग गर्ने स्पष्ट पारेका छन् ।

एक भिडियोमा उनले आफू सुरुदेखि नै जसपामा रहेको, पार्टीप्रति प्रतिबद्ध रहेको र गोडैता नगरपालिका–५ का निर्वाचित वडाध्यक्षका रूपमा काम गरिरहेको बताएका छन् ।

यसघि पार्टीको गठबन्धनका कारण केही समयका लागि नेपाली कांग्रेस मधेश प्रदेशका उपसभापति वीरेन्द्र सिंहसँग नजिकिएको र सोही कारण त्यहाँ गएको बेला आफूलाई सम्मान गरेको उनले बताएका छन् ।

साथै, उनले आफ्नो पार्टी छोडेर अन्य कुनै दललाई भोट नदिने र जसपाप्रति पूर्ण निष्ठा कायम राख्ने प्रतिबद्धता पनि व्यक्त गरे ।

हिजो ( बुधबार ) सर्लाहीको गोडैतामा गगनलाई सहयोग गर्ने भन्नै उनीसहित चार जना वडाध्यक्ष कांग्रेस प्रवेश गरेका थिए ।