बैतडीमा निर्वाचनका लागि एक हजार ४०० बढी जनशक्ति खटाइने

१७ माघ, बैतडी । आगामी फागुन २१ गते हुने प्रतिनिधिसभा सदस्य निर्वाचनका लागि बैतडीमा एक हजार चार सय बढी जनशक्ति खटाइने भएको छ । जिल्ला निर्वाचन कार्यालय बैतडीका अनुसार २१४ मतदान केन्द्रमा एक हजार ४४२ जना जनशक्ति खटाइने भएको हो ।

निर्वाचनमा जनशक्ति परिचालनका लागि यहाँ रहेका सरकारी कार्यालयबाट विवरण माग गरिएको निर्वाचन कार्यालय बैतडीका प्रमुख खगेन्द्र भारतीले जानकारी दिए । माग गरिएको विवरण आएपछि मतदान केन्द्रको जिम्मेवारी पनि तोकिने उनले बताए ।

एक निर्वाचन क्षेत्र रहेको बैतडीमा ११ जनाको उम्मेदवारी कायम रहेको छ । यहाँ १ लाख ५६ हजार ३७२ मतदाता रहेका छन् । तीमध्ये ७८ हजार ९८७ पुरुष, ७७ हजार ३८३ महिला र दुई अन्य मतदाता रहेका छन् ।

५ सय भन्दा बढी मतदाता भएको मतदान केन्द्रमा ८ जना र सोभन्दा कम मतदाता भएको केन्द्रमा ७ जनाको दरले कर्मचारी खटाइने निर्वाचन कार्यालयका सूचना अधिकारी नरेश दयालले बताए ।

सुरक्षा दृष्टिले बैतडीका ३३ मतदानस्थल अतिसंवेदनशील सूचीमा राखिएका छन् । जिल्ला सुरक्षा समितिका अनुसार १२९ मतदानस्थलमध्ये ३३ अतिसंवेदनशील, २८ संवेदनशील र ६८ सामान्य श्रेणीमा वर्गीकरण गरिएको छ ।