सम्भावित मन्त्री भन्दै आएका नामबारे बालेन टिमको चासो

२९ फागुन, काठमाडौं । प्रधानमन्त्री प्रस्तावित गरिएका राष्ट्रिय स्वतन्त्र पार्टी(रास्वपा) वरिष्ठ नेता बालेन शाह चुनावी दौडधुपपछि घरमै आराम गरिरहेका छन् । धुलोधुँवासहितको लगातार यात्राका कारण उनी हल्का बिरामी रहेका हुन् ।

छाती र खुट्टामा हल्का समस्या देखिएपछि आराम गरिरहेका पार्टी सभापति रवि लामिछानेलाई बिहीबार निवासमा गएर भेट्नेबाहेक बालेन कसैसँग भेट गरिरहेका छैनन् । सभापति लामिछाने र बालेनबीच आगामी सरकारको सम्भावित खाकाबारे मोटामोटी कुराकानी भए पनि उनीहरू मन्त्रीहरूको नाम र कार्यविभाजनको मुद्दामा प्रवेश गरिनसकेको बालेनका सहकर्मीले अनलाइनखबरलाई बताए ।

‘रवि दाइलाई सन्चो नभएकाले बालेन भेट्न गएका हुन्, खासमा उनलाई पनि सन्चो छैन,’ बालेन टिमले भन्यो, ‘कसैसँग भेट गर्ने कुरै भएन । फेसबुकमा मन्त्रीको नाम आइरहेको छ, तर रवि दाइ र बालेनले नै यो विषयमा प्रवेश नगरेपछि अरुले भन्दै हिँड्नुको अर्थ पनि छैन ।’

समानुपातिक तर्फका सांसदको संख्या बल्ल किटान भए पनि नाम फाइनल नभएको अवस्थामामा सरकारको टिमबारे बोल्न हतारो नगर्न बालेन टिमले आग्रह गरेको छ ।

‘१२–१३ जनाभन्दा धेरै मन्त्री सायद हुँदैनन् भन्नेमा नेताहरू प्रष्ट छन्, तर को को कुन मन्त्रालय जाने भन्नेमा अहिले प्रवेश नै भएको छैन,’ एक सहकर्मीले भने, ‘पहिले रेस्ट गर्न दिउँ न । आफू पनि रेस्ट गरुँ । नेपालीहरूले मरीमरी काम गर्न पनि जानेका छैनन्, रेस्ट गर्न पनि जानेका छैनन् ।’

रास्वपाको विधानमा पार्टी सदस्यहरुले समेत संसदीय दल नेता छान्ने उल्लेख भए पनि बालेनसँग लामिछानेले गरेको पूर्वसहमतिकै स्पिरिटमा विधान संशोधन गर्न लागिएको पार्टीले जानकारी दिएको छ ।

यसअघि ०७९ को चुनावमा समेत सांसदकै निर्णयले संसदीय दल नेता चुनिएको भन्दै नेताहरूले यसपल्ट पनि सोही बमोजिम निर्णय हुने बताए ।

सभापति लामिछाने र वरिष्ठ नेता बालेन दुवै स्वास्थ्यलाभ गरिरहेकाले अनावश्यक अनुमान र टिप्पणीमा नओर्लन रास्वपा नेतृत्वले पार्टीपंक्ति र आकांक्षीलाई सजग गराएको छ । आफूहरू मन्त्रीको विषयमा प्रवेश गर्नै बाँकी रहेको नेताहरूले बताएका छन् ।

अर्थमन्त्रीमा हालका मन्त्री रामेश्वर खनालको नाम ल्याउँदै प्रचार गरिएकोमा बालेन टिमले चासो देखाएको छ । यसअघि रास्वपाको एक कार्यक्रममा सभापति लामिछानेले उपसभापति स्वर्णिम वाग्लेलाई बजेट लेख्ने तयारी गर्न मञ्चबाटै आग्रह गरेका थिए ।

पछिल्लो दिनमा रास्वपाभित्र टकराव बढेकाले वाग्लेको विकल्प खोजिन थालेको प्रचार भए पनि टिम बालेनले त्यसलाई खारेज गर्‍यो । अहिले भएकै सांसदहरुबाट मन्त्री बनाइने संविधान अनुरूप कार्यान्वयन गरिने उनीहरूले जानकारी दिएका छन् ।

‘खनालजीलाई अर्थमन्त्री प्रस्ताव गरिएको भन्ने हल्ला पूर्णत: झुटो हो, त्यो कहाँबाट के उद्देश्यका लागि फैलाइयो भन्ने थाहा भएन,’ बालेननजिक रहेका नेताहरूले अनलाइनखबरलाई भने, ‘यो भन्दा पहिलेका मन्त्रिपरिषद् गठन गर्दा जुन खाले लफडाहरू भए, ती अब हुँदैनन् । हामी आवश्यकताले जे देखाउँछ त्यो मात्रै गर्छौँ ।’

निर्वाचन आयोगले आइतबार साँझसम्ममा समानुपातिक सूची प्राप्त गरिसक्ने, त्यसपछि राष्ट्रपति रामचन्द्र पौडेलसमक्ष निर्वाचन प्रतिवेदन बुझाउने कार्यक्रम छ । त्यसपछि मात्रै संसदीय दल नेता चयन, अनि सम्भावित मन्त्रीको नामबारे पार्टीभित्र छलफल हुने रास्वपाले बताएको छ ।

‘विशेष परिस्थितिमा भएको चुनावले अभूतपूर्व मत दिएको छ, त्यसको सन्देश पार्टीका सबैले बुझ्नुभएको छ,’ रास्वपा उच्च तहका नेताले भने, ‘त्यसैले रवि दाइ र बालेनबीचको सहमति जे हुन्छ, त्यसैलाई पार्टीले संस्थागत रूप दिने हो । विशेष परिस्थिति हो यो ।’