कैलालीमा वन्यजन्तुको अंग लुकाइएको घटना : प्रहरीमाथि कारबाही गर्न ढिलाइ

News Summary

Generated by OK AI. Editorially reviewed.

कैलालीमा वन्यजन्तुको अंग र भरुवा बन्दुकसहित दुई जना पक्राउ परेका थिए, तर मुद्दा कमजोर बनाउन प्रहरीको भूमिका भएको पाइएको छ।
प्रहरी निरीक्षक दानसिंह भण्डारीसहितका प्रहरीमाथि छानबिन समितिले कारबाही सिफारिस गरेको छ, तर चुनावका कारण कारबाही ढिलाइ भएको छ।
सुदूरपश्चिम प्रदेश प्रहरी कार्यालयले छानबिन प्रतिवेदन बुझाएर कारबाही प्रक्रिया अघि बढाउने जनाएको छ।

१ चैत, धनगढी । कैलालीमा वन्यजन्तुको अंग र भरुवा बन्दुकसहित दुई जना पक्राउ परेको घटनामा मुद्दा कमजोर बनाउन भूमिका खेलेको आरोपमा केही प्रहरीमाथि कारबाही सिफारिस गरिएको छ । तर प्रहरी नियमावलीअनुसार सिफारिसमा परेका प्रहरीलाई कारबाही गर्न भने ढिलाइ भइरहेको पाइएको छ ।

इलाका प्रहरी कार्यालय मालाखेतीले गत ९ साउनमा गोदावरी नगरपालिका–८ बाट दुई भरुवा बन्दुक, चित्तलको सिङ र खुट्टासहित स्थानीय २३ वर्षीय चन्द्रबहादुर चौधरी र राजकुमार चौधरीलाई पक्राउ गरेको थियो ।

तर, पक्राउ परेकामाथि मुद्दा चलाउने क्रममा भने चित्तलको सिङ र खुट्टा विवरणमा नदेखाएर गायब पारिएको पाइएपछि तत्कालीन अनुसन्धान अधिकृत प्रहरी निरीक्षक दानसिंह भण्डारीसहितका प्रहरी कर्मचारीमाथि छानबिन गरिएको थियो ।

सुदूरपश्चिम प्रदेश प्रहरी कार्यालयका तत्कालीन प्रहरी नायब उपरीक्षक (डीएसपी) निशान्त श्रीवास्तव नेतृत्वको समितिले यो प्रकरणको छानबिन गर्दै गत पुसको पहिलो साता प्रतिवेदन बुझाएको थियो ।

प्रतिवेदनअनुसार प्रहरी निरीक्षक भण्डारीसहितका प्रहरीले बरामद वन्युजन्तुको अंग लुकाउने कार्यमा भूमिका खेलेको पाइएको भन्दै नियमावलीबमोजिम कारबाही सिफारिस गरिएको छ ।

तर, छानबिन समितिले प्रतिवेदन बुझाएको तीन महिना बितिसक्दा समेत सिफारिसअनुसार उनीहरूमाथि कारबाही भएको छैन ।

सुदूरपश्चिम प्रदेश प्रहरी कार्यालयका प्रमुख प्रहरी नायब महानिरीक्षक(डीआईजी) ओमबहादुर रानाले निर्वाचनका कारण कारवाही गर्न ढिलाइ भएको बताए । जिल्ला प्रहरी कार्यालय कैलालीलाई छानबिन समितिको सिफारिसअनुसार कारबाही गर्न निर्देशन भइसकेकाले चाँडै गरिने रानाले बताए ।

कैलालीका प्रमुख प्रहरी उपरीक्षक(एसपी) नरेन्द्र चन्दले पनि चुनावका कारण केही ढिलो भए पनि छानबिनको प्रक्रिया अघि बढिसकेको जानकारी दिए । उनका अनुसार छानबिन समितिको सिफारिसअनुसार घटनामा मुछिएका प्रहरी निरीक्षक भण्डारीसहितका प्रहरीलाई स्पष्टीकरण सोधिएको र जवाफ आएपछि थप कारबाही प्रक्रिया अघि बढाइने छ ।

वन्यजन्तुको अंग लुकाउन भूमिका खेलेको आरोपमा कारबाही सिफारिस परेका इप्रका मालाखेतीका मुद्दा शाखाका तत्कालीन प्रमुख प्रहरी निरीक्षक दानसिंह भण्डारी अहिले इलाका प्रहरी कार्यालय साँफेबगरमा कार्यरत छन् ।

बन्दुक र वन्यजन्तुको अंगसहित दुई जना पक्राउ परेको घटनामा आर्थिक चलखेल गर्दै वन्यजन्तुको अंग लुकाएर मुद्दा कमजोर बनाएको भन्दै भण्डारीविरुद्ध प्रहरी प्रधान कार्यालयमा बेनामे उजुरी परेको थियो ।

सोही उजुरीका आधारमा प्रहरी प्रधान कार्यालयको निर्देशनअनुसार प्रदेशले इलाका मालाखेतीका प्रमुख प्रहरी नायब उपरीक्षक (डीएसपी) रणबहादुर चन्दको नेतृत्वमा छानबिन समिति गठन गरेको थियो ।

सो समितिले बुझाएको प्रतिवेदन चित्तबुझ्दो नदेखिएको भन्दै पुन: प्रदेशले डीएसपी निशान्त श्रीवास्तवको नेतृत्वमा छानबिन समिति बनाएको थियो ।