साइकल चढेर संसद् भवन गए रास्वपा सांसद गजुरेल

News Summary

Generated by OK AI. Editorially reviewed.

रास्वपा सांसद आशिष गजुरेलले निर्वाचनपछिको पहिलो संसद बैठकमा सहभागी हुन साइकल चढेर सिंहदरबार पुगेका छन्।
गजुरेल सिन्धुली क्षेत्र नम्बर २ बाट प्रत्यक्ष निर्वाचित प्रतिनिधि सभा सदस्य हुन्।
उनले सम्भव भएसम्म हिँड्न र नभए सार्वजनिक यातायात प्रयोग गर्न सुझाव दिएका छन्।

काठमाडौं । रास्वपा सांसद आशिष गजुरेल साइकल चढेर संसद भवन गएका छन् ।

सार्वजनिक यातायात पूर्वाधार विज्ञसमेत रहेका गजुरेल निर्वाचनपछिको पहिलो संसद बैठकमा सहभागी हुन साइकल चढेर सिंहदरबार गएका हुन् ।

दौरा सुरुवाल लगाएका उनी माउन्टेन बाइक चढेर सिंहदरबारस्थित संघीय संसद भवन गएको फोटो सार्वजनिक भएको छ ।

उनले सम्भव भएसम्म हिँड्न, नभए सार्वजनिक यातायात चढ्न सुझाव समेत दिएका छन् ।

उनी सिन्धुली क्षेत्र नम्बर २ बाट प्रतिनिधि सभा सदस्यमा प्रत्यक्ष निर्वाचित भएका हुन् ।

अनलाइनखबरसँग कुरा गर्दै गजुरेलले निजी सवारी साधनको प्रयोग घटाउँदै वातावरण प्रदूषण न्यूनीकरण गर्ने र सुरक्षित सार्वजनिक यातायात प्रयोगलाई प्रवर्द्धन गर्ने आफ्नो पहिलेदेखिकै एजेण्डा भएकाले त्यही सन्देश दिनका लागि साइकल चढेर संसद भवन गएको बताए ।

सार्वजनिक यातायात र साइकल प्रयोगलाई प्रोत्साहन गर्ने हो भने डिजेल पेट्रोलमा बाहिरिने रकम जोगिने र प्रदूषण पनि कम हुने उनको भनाइ छ । ‘यी कुरा पहिले मैले सडकबाट आवाज उठाउँथेँ । अब संसदबाट त्यो सन्देश दिन चाहान्छु,’ उनले भने ।