नासुको खातामा सवा ४ करोड घुस

News Summary

Generated by OK AI. Editorially reviewed.

अख्तियार दुरुपयोग अनुसन्धान आयोगले पुरातत्व विभागका सहायक पथ प्रदर्शक देउकला अधिकारीको खातामा चार करोड २२ लाख ७५ हजार ९८५ रुपैयाँ घुस डिपोजिट भएको आरोप लगाएको छ।
अख्तियारले उपसचिव पूर्णबहादुर श्रेष्ठ र देउकला अधिकारीविरुद्ध भ्रष्टाचार र सम्पत्ति शुद्धीकरणको मुद्दा दायर गरेको छ।
निर्माण सेवा प्रालिले पुरातत्व विभागबाट ६४ करोड २१ लाख रुपैयाँको ठेक्का पाएको र घुस रकमबाट जग्गा र सुन खरिद गरेको अख्तियारले दाबी गरेको छ।

८ वैशाख, काठमाडौं ।

नाम : देउकला अधिकारी

पद : सहायक पथ प्रदर्शक(सुब्बा)

खातामा घुस : चार करोड २२ लाख ७५ हजार ९८५ रुपैयाँ ।

पुरातत्व विकासमा कार्यरत सहायक पथ प्रदर्शक देउकला अधिकारीको खातामा चार करोड २२ लाख रुपैयाँ घुस डिपोजिट भएको भन्दै अख्तियार दुरुपयोग अनुसन्धान आयोगले दुई जनामाथि भ्रष्टाचार मुद्दा दायर गरेको छ ।

अख्तियारले पुरातत्व विभागका सिडीई (उपसचिव) पूर्णबहादुर श्रेष्ठ र सहायक पथप्रदर्शक (नासु देउकला अधिकारी) विरुद्ध ठेक्कापट्टामा घुस लिएको आरोप लगाएको हो ।

निर्माण सेवा प्रालि नामक कम्पनीले पुरातत्व विभागबाट विभिन्न कामका क्रममा ६४ करोड २१ लाख रुपैयाँको ठेक्का पाएको र ठेक्का बापतको रकम घुसको रूपमा अधिकारीको खातामा राखिदिएको अख्तियारको आरोप छ ।

ती विभिन्न ठेक्काहरूमा सहजीकरण गरिदिएको र चार करोड २२ लाख रुपैयाँ घुस खातामा भेटिएको अख्तियारको दाबी छ ।

अख्तियारको दाबी अनुसार, उनीहरूले आफ्नो संयुक्त नाममा नुवाकोटमा तीन कित्ता गरी १५ रोपनी जग्गा र काठमाडौंमा साढे तीन आना जग्गा किनेको अख्तियारको आरोप छ ।

उनीहरूले घुसबापतको रकमबाट करिब सय ग्राम सुन खरिद गरेको, घुसबापत पाएको रकम चेकबाट साटेर नगद लिएको र ऋण स्वरूप लगानी गरेको अख्तियारको आरोप छ ।

अख्तियारले उनीहरूमाथि भ्रष्टाचार र सम्पत्ति शुद्धीकरणको मुद्दा दायर गरेको हो ।