सरकारले ‘डोजर आतंक’ गरेको भन्दै तत्काल रोक्न नेकपा सांसद शर्माको माग

News Summary

Generated by OK AI. Editorially reviewed.

नेपाली कम्युनिष्ट पार्टीकी सांसद बलावती शर्माले सुकुमवासी व्यवस्थापनमा डोजर आतंक तत्काल रोक्न सरकारको ध्यानाकर्षण गराएकी छिन्।
सांसद शर्माले सुकुमवासी पहिचान नगरी डोजर चलाउँदा खोला किनारका बस्तीहरूमा मानवीय सङ्कट उत्पन्न भएको बताएकी छिन्।
सांसद शर्माले सशस्त्र द्वन्द्व अन्त्य भएको दुई दशक पुग्न लाग्दा पनि बेपत्ता पारिएका व्यक्तिहरूको अवस्था सार्वजनिक हुन नसक्नु दु:खद् भएको बताइन्।

२१ वैशाख, काठमाडौं । नेपाली कम्युनिष्ट पार्टीकी सांसद बलावती शर्माले सुकुमवासी व्यवस्थापनका नाममा ‘डोजर आतंक’ भइरहेको भन्दै तत्काल रोक्न सरकारको ध्यानाकर्षण गराएकी छिन् ।

प्रतिनिधि सभाअन्तर्गतको कानुन, न्याय तथा मानव अधिकार समितिको बैठकमा बैठकमा आफ्नो धारणा राख्दै सांसद शर्माले वास्तविक सुकुमवासी र हुकुमवासीको पहिचान नगरी बस्तीहरूमा डोजर चलाउँदा मानवीय सङ्कट उत्पन्न भएको बताएकी हुन् ।

‘वास्तविक सुकुमवासी को हो भन्ने पहिचान नगरी र उचित विकल्प नदिई डोजर चलाउँदा अहिले खोला किनारका बस्तीहरूमा चिल्लीबिल्ली भएको छ । आज बालबालिकाहरू स्कुल जान पाएका छैनन्, कक्षा १२ को परीक्षा चलिरहेको छ,’ उनले भनिन्, ‘सुत्केरी र गर्भवती महिलाहरूको अवस्था दयनीय छ । हाम्रो समिति मानव अधिकार समिति पनि भएकाले यसतर्फ गम्भीर ध्यानाकर्षण हुनुपर्छ ।’

सरकारले पहिला सुकुमवासी पहिचानका लागि टोली खटाउनुपर्ने र उचित व्यवस्थापन गरेपछि मात्रै संरचना हटाउनुपर्नेमा उनको जोड थियो । ‘यो जमिन सरकारको हो भने हामी नागरिक चाहीँ कसका हौँ ?’ भन्ने सुकुमवासीहरूको प्रश्नलाई सरकारले गम्भीरतापूर्वक लिनुपर्ने उनको भनाइ छ ।

सांसद शर्माले सशस्त्र द्वन्द्व अन्त्य भएको दुई दशक पुग्न लाग्दा पनि बेपत्ता पारिएका व्यक्तिहरूको अवस्था सार्वजनिक हुन नसक्नु दु:खद् भएको बताइन् ।

‘गम्भीर मानव अधिकार उल्लङ्घनका घटनामा दोषीलाई सजाय र अन्य हकमा आममाफी दिएर भएपनि शान्ति प्रक्रियालाई पूर्णता दिनु जरुरी छ । अब यसलाई धेरै लम्ब्याउनु हुँदैन,’ उनले भनिन् ।