बीमा प्राधिकरणको अध्यक्ष पदका लागि खुल्यो आवेदन

News Summary

Generated by OK AI. Editorially reviewed.

नेपाल बीमा प्राधिकरणको रिक्त अध्यक्ष पद नियुक्तिका लागि गठित सिफारिश समितिले योग्य नागरिकबाट सात दिनभित्र आवेदन माग गरेको छ ।
इच्छुक आवेदकले आगामी १९ जेठभित्र अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा आवेदन पेश गर्नुपर्नेछ ।
अध्यक्षका लागि तोकिएका विषयमा कम्तीमा स्नातकोत्तर तह उत्तीर्ण गरेको तथा ३० वर्ष पूरा भई ६५ वर्ष ननाघेको हुनुपर्ने योग्यता तोकिएको छ ।

१३ जेठ, काठमाडौं । नेपाल बीमा प्राधिकरणको अध्यक्ष पद नियुक्तिका लागि गठित सिफारिस समितिले आवेदन माग गरेको छ ।

रिक्त अध्यक्ष पदमा नियुक्तिको लागि नाम सिफारिस गर्ने समितिले एक सार्वजनिक सूचना जारी गर्दै योग्यता पुगेका नागरिकलाई ७ दिनभित्र आवेदन दिन भनेको छ । जेठ १९ गतेभित्र इच्छुक नागरिकले अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा आवेदन पेश गर्नुपर्नेछ ।

प्राधिकरणको अध्यक्षका लागि बीमा, मौद्रिक, बैकिङ वाणिज्यशास्त्र, इन्जिनियरिङ, व्यवस्थापन, जनप्रशासन, तथ्यांकशास्त्र, गणित, अर्थशास्त्र वा कानुन विषयमा कम्तीमा स्नातकोत्तर वा सो सरहको उपाधि हासिल गरेको हुनुपर्नेछ ।

त्यस्तै उच्च नैतिक चरित्र भएको, ३० वर्ष पूरा भइ ६५ वर्ष ननाघेको, भ्रष्टाचार, सम्पत्ती शुद्धीकरण, मानव बेचबिखनजस्ता कसूर नरहेका, कालोसूचीमा नपरेका वा फुकुवा भएको ३ वर्ष पूरा भएको जस्ता योग्यता जरुरत पर्दछ ।