नेपालमा डिजिटल पहुँचको तीव्र विस्तार, इन्टरनेट प्रयोगकर्ता साढे १४५ प्रतिशतभन्दा बढी

News Summary

Generated by OK AI. Editorially reviewed.

आर्थिक सर्वेक्षण अनुसार चालु आर्थिक वर्षको फागुनसम्म नेपालमा इन्टरनेट ग्राहकको घनत्व १४५.७ प्रतिशत पुगेको छ ।
नेपालमा फोरजी सेवाको पहुँच कुल जनसङ्ख्याको ८९.६ प्रतिशत र मोबाइल ब्रोडब्यान्डको पहुँच १००.३ प्रतिशत पुगेको छ ।
चालु आर्थिक वर्षको फागुनसम्म देशभर १९,२३९ किलोमिटर अप्टिकल फाइबर विस्तार भएको आर्थिक सर्वेक्षणमा उल्लेख छ ।

१३ जेठ, काठमाडौं । नेपालको दूरसञ्चार र इन्टरनेट क्षेत्रमा पछिल्ला वर्षहरूमा उल्लेख्य प्रगति भएको छ।

सरकारी तथ्यांकले नेपालको कुल जनसङ्ख्याको तुलनामा इन्टरनेटको पहुँच सघन रूपमा बढ्दै गएको र देश ‘‍डिजिटल युग’ ‍तर्फ उन्मुख रहेको देखाएको छ।

इन्टरनेट ग्राहकको घनत्व १४५.७ प्रतिशत

आर्थिक सर्वेक्षण २०८२/८३ का अनुसार, इन्टरनेट प्रयोगकर्ताको दरमा निरन्तर वृद्धि भइरहेको छ।

चालु आर्थिक वर्षको फागुनसम्म इन्टरनेट ग्राहकको घनत्व १४५.७ प्रतिशत पुगेको छ । अघिल्लो वर्षको सोही अवधिमा यस्तो घनत्व १३९.५ प्रतिशत थियो ।

इन्टरनेट घनत्वले प्रति १०० जनामा कति इन्टरनेट कनेक्सनमा छन् भन्ने देखाउँछ ।

उदाहरणका लागि, नेपालको जनसंख्या ३ करोड छ भन्ने मान्दा १४५.७ प्रतिशत घनत्वको अर्थ करिब ४ करोड ३७ लाख इन्टरनेट सदस्यता छ भन्ने हो ।

इन्टरनेट सेवामा पहुँच

आर्थिक सर्वेक्षण अनुसार, दूरसञ्चार सेवा प्रदायक र इन्टरनेट सेवा प्रदायक (आईएसपी) हरूको सेवा विस्तारसँगै इन्टरनेट ग्राहकहरूको सङ्ख्या निरन्तर उकालो लागेको छ । विशेषगरी फोरजी सेवाको पहुँच हाल कुल जनसङ्ख्याको ८९.६ प्रतिशत पुगेको छ ।

डिजिटल अर्थतन्त्रका लागि आवश्यक ब्रोडब्यान्ड सेवाको विस्तार तीव्र छ। मोबाइल ब्रोडब्यान्ड पहुँच जनसङ्ख्याको १००.३ प्रतिशत पुगेको आर्थिक सर्वेक्षणमा उल्लेख छ ।

त्यसैगरी, अप्टिकल फाइबर विस्तारमा पनि नेपालले ठूलो फड्को मारेको छ । २०८२ फागुनसम्म १९,२३९ किलोमिटर अप्टिकल फाइबर विस्तार भइसकेको आर्थिक सर्वेक्षणमा उल्लेख छ ।

८२ प्रतिशत घरधुरीमा टेलिभिजन

डिजिटल टेलिभिजनको पहुँच ८२ प्रतिशत घरधुरीमा पुगेको आर्थिक सर्वेक्षणमा उल्लेख छ ।

मोबाइल टेलिफोन ग्राहकको घनत्व भने १०३.२ प्रतिशत रहेको छ । बढ्दो मोबाइल प्रयोगसँगै परम्परागत आधारभूत टेलिफोनको प्रयोग भने क्रमशः घट्दो क्रममा छ ।

सरकारी सेवामा ई-गभर्नेन्स

सरकारले ई-गभर्नेन्स प्रणालीलाई प्राथमिकता दिएको छ। हालसम्म २२० सरकारी निकाय एकीकृत कार्यालय व्यवस्थापन प्रणालीमा आबद्ध भइसकेका छन् भने १५० सरकारी निकायको वेबसाइट सञ्चालनमा रहेका छन् ।

पछिल्लो पाँच वर्षको तथ्यांक हेर्दा नेपालमा ब्रोडब्यान्ड इन्टरनेटको पहुँच र प्रयोगमा गुणात्मक सुधार आएको छ।

विशेषगरी, इन्टरनेट सेवा प्रदायकहरूको भूमिका बढ्नु, सरकारी निकायमा अनलाइन सेवा प्रणाली (ई-गभर्नेन्स) को विस्तार हुनु र आम नागरिकमा स्मार्ट डिभाइसको पहुँच पुग्नुले नेपालको डिजिटल पूर्वाधार बलियो बन्दै गएको देखिन्छ ।

तथापि, भौगोलिक विकटताका कारण केही ग्रामीण क्षेत्रमा अझै पनि उच्च गतिको इन्टरनेट सेवाको उपलब्धतालाई थप प्रभावकारी बनाउनु सरकारका लागि चुनौतीको विषय रहेको छ।