निजी क्षेत्रतर्फ कर्जा बढ्यो साढे २३ अर्ब

२ असोज, काठमाडौं । चालु आर्थिक वर्ष बैंक तथा वित्तीय संस्थाको कर्जा लगानीमा सुधार आएको छ ।

चालु आव साउनमा मात्रै बैंक तथा वित्तीय संस्थाबाट २३ अर्ब ५८ करोड बराबर कर्जा प्रवाह भएको छ ।

बैंक तथा वित्तीय संस्थाबाट निजी क्षेत्रमा प्रवाहित कर्जा ०.४ प्रतिशत वृद्धि भई ५८ खर्ब ८० अर्ब ६४ करोड पुगेको राष्ट्र बैंकले जनाएको छ । गत आव सोही अवधिमा २ अर्ब ९३ करोडले घटेको थियो ।

वार्षिक बिन्दुगत आधारमा २०८३ साउन मसान्तमा बैंक तथा वित्तीय संस्थाबाट निजी क्षेत्रतर्पm प्रवाहित कर्जा ७ प्रतिशतले बढेको छ ।

साउन मसान्तमा निजी क्षेत्रमा प्रवाहित कर्जामध्ये गैरवित्तीय संस्थागत क्षेत्रतर्फ प्रवाह भएको कर्जा अंश ६२.३ प्रतिशत छ ।

त्यसैगरी व्यक्तिगत तथा घरपरिवार क्षेत्रतर्फ प्रवाह भएको कर्जा अंश ३७.७ प्रतिशत छ । गत आव सोही महिना यस्तो अंश क्रमश: ६२.७ र ३७.३ प्रतिशत थियो ।

चालु आव साउनसम्ममा निजी क्षेत्रतर्पm प्रवाहित कर्जामध्ये वाणिज्य बैंकहरूको ०.५ प्रतिशत र वित्त कम्पनीको ०.१ प्रतिशत बढेको छ भने विकास बैंकको ०.३ प्रतिशत घटेको छ ।

साउन मसान्तमा बैंक तथा वित्तीय संस्थाको लगानीमा रहेको कर्जामध्ये चालु सम्पत्ति सुरक्षणमा १५.३ प्रतिशत छ भने घरजग्गा धितो सुरक्षणमा ६३ प्रतिशत छ । २०८२ साउन मसान्तमा यस्तो धितोमा प्रवाहित कर्जाको अंश क्रमश: १४.८ र ६४.४ प्रतिशत थियो।

गत साउनमा बैंक तथा वित्तीय संस्थाको लगानीमा रहेको कर्जामध्ये खनिज क्षेत्रतर्फ ३.७ प्रतिशत, धातुजन्य उत्पादन, यन्त्र र विद्युतीय सामान उत्पादन तथा मर्मत ३, निर्माण २.१, सेवा उद्योग १.८, यातायात, सञ्चार तथा सार्वजनिक सेवा १.२, यातायात उपकरण उत्पादन तथा मर्मत ०.८, थोक तथा खुद्रा व्यापार ०.३ र औद्योगिक उत्पादन क्षेत्रतर्फ ०.३ प्रतिशतले बढेको छ । तर वित्त, बीमा तथा अचल सम्पत्ति क्षेत्रतर्फ ५.१, कृषि ०.९ र उपभोग्य क्षेत्रतर्फ ०.६ प्रतिशतले घटेको राष्ट्र बैंकले जनाएको छ ।

त्यस्तै बैंक तथा वित्तीय संस्थाबाट प्रवाहित कर्जामध्ये आवधिक कर्जा १.५ प्रतिशत, ट्रस्ट रिसिट (आयात) कर्जा १, रियल इस्टेट कर्जा (व्यक्तिगत आवासीय घर कर्जासमेत) ०.७ र हायर पर्चेज कर्जा ०.१ प्रतिशत बढेको छ ।

तर विपन्न वर्ग कर्जा ७.३ प्रतिशत, अधिविकर्ष कर्जा २.६, क्यास क्रेडिट कर्जा १.१ र माग तथा अन्य चालु पूँजी कर्जा ०.५ प्रतिशतले घटेको केन्द्रीय बैंकले जनाएको छ ।