रोहित शेट्टीदेखि सलमान खानसम्म, बलिउडका यी सेलिब्रेटीमाथि कसले गरे आक्रमण ?

बलिउड अभिनेता टाइगर श्राफको कारमा आइतबार साँझ मुम्बईमा अज्ञात आक्रमणकारीहरूले गोली प्रहार गरेका छन् ।  गोली प्रहारको घटनामा दुई जना घाइते भएका छन् ।

पछिल्ला केही वर्षमा बलिउडसँग सम्बन्धित विभिन्न सेलिब्रेटीमाथि ज्यान लिने उद्देश्यले आक्रमण गर्ने प्रयास भएका छन् । टाइगर श्राफमाथि भएको आक्रमणले फेरि एकपटक यस्ता व्यक्तिको सुरक्षाबारे चिन्ता बढाएको छ ।

पछिल्लो समय फिल्म क्षेत्रसँग सम्बन्धित व्यक्तिमाथि आक्रमण भएका वा उनीहरू आक्रमणकारीको निशानामा परेका घटनामा अभिनेता सलमान खान र सैफ अली खानको नाम पनि चर्चामा छ ।

बलिउडका ती सेलिब्रेटीबारे चर्चा गरौँ, जो पछिल्लो समय आक्रमणकारीको निशानामा परेका छन् ।

रोहित शेट्टी

फिल्म निर्माता रोहित शेट्टीको मुम्बईको जुहुस्थित घरमा सन् २०२६ मा गोली प्रहार भएको थियो ।

प्रहरीले यस आक्रमणमा शुभम लोणकर गिरोह संलग्न रहेको बताएको थियो । गोली प्रहारको उद्देश्य धम्की दिएर रकम असुल्नु र त्रास फैलाउनु रहेको प्रहरीको भनाइ थियो । अनुसन्धानका क्रममा प्रहरीले यस घटनामा संलग्न भएको आशंकामा केही व्यक्तिलाई पक्राउ गरेको थियो ।

यस घटनामा प्रदीप कुमार उर्फ गाथलाई सन् २०२६ अक्टोबरमा उत्तर प्रदेशको आग्राबाट उत्तर प्रदेश स्पेसल टास्क फोर्स र मुम्बई प्रहरीको क्राइम ब्रान्चले पक्राउ गरेको थियो ।

दिशा पटानी

सन् २०२५ सेप्टेम्बरमा उत्तर प्रदेशको बरेलीमा अभिनेत्री दिशा पटानीका पिता जगदीश पटानीको घरबाहिर अज्ञात बन्दुकधारीहरूले गोली चलाएका थिए ।

यस आक्रमणको जिम्मेवारी गोल्डी बरार र रोहित गोदारा गिरोहले सामाजिक सञ्जालमार्फत लिएका थिए । समाचारअनुसार, दिशाकी बहिनी खुशबू पटानीले आध्यात्मिक गुरुहरूबारे गरेको भनिएको टिप्पणीपछि चेतावनी दिन गोली चलाइएको गिरोहको दाबी थियो ।

यस घटनामा संलग्न दुई आक्रमणकारी पछि गाजियाबादमा प्रहरीसँगको मुठभेडमा मारिएका थिए ।

सलमान खान

सन् २०२४ अप्रिलमा मुम्बईस्थित अभिनेता सलमान खानको घरबाहिर गोली प्रहार भएको थियो । यस घटनामा प्रहरीले दायर गरेको आरोपपत्रमा ग्याङस्टर लरेन्स बिश्नोईको नाम पटकपटक उल्लेख गरिएको छ ।

बिश्नोई समुदायका मानिसहरू कालो हरिणलाई पवित्र मान्छन् ।

करिब २० वर्षअघि फिल्मको छायांकनका क्रममा सलमान खानमाथि दुईवटा कालो हरिणको सिकार गरेको आरोप लागेको थियो । प्रहरीका अनुसार, यही घटनाका कारण बिश्नोई गिरोह सलमानसँग असन्तुष्ट थियो ।

राकेश रोशन

फिल्म निर्माता राकेश रोशन सन् २००० जनवरी २१ मा भएको ज्यान लिने प्रयासबाट जोगिएका थिए । मुम्बईस्थित उनको कार्यालयबाहिर दुई जना अज्ञात बन्दुकधारीले गोली चलाएका थिए । उक्त आक्रमणमा उनको हात र छातीमा गोली लागेको थियो । तर, उनी बाँच्न सफल भए ।

यो घटना उनका छोरा ऋतिक रोशनको पहिलो फिल्म ‘कहो ना प्यार है’ सफल भएपछि भएको थियो । रकम असुल्न खोज्ने व्यक्तिहरूलाई पैसा दिन अस्वीकार गरेपछि राकेश रोशनलाई निशाना बनाइएको बताइन्छ ।

बीबीसीसँगको एक अन्तर्वार्तामा ऋतिकले आफ्नो पहिलो फिल्म चर्चामा आइरहेका बेला बुबामाथि गोली प्रहार भएको खबर सुन्दाको पीडा सम्झिएका थिए ।

ऋतिकले भनेका थिए, “उहाँको छाती र हातमा गोली लागेको थियो । मलाई याद छ, उहाँले मलाई फोन गर्नुभएको थियो, किनकि उहाँलाई म ठीक छु कि छैन भन्ने चिन्ता थियो ।”

उनका अनुसार, बुबालाई परिवारका अन्य सदस्यसमेत जोखिममा पर्न सक्ने डर थियो ।

राजीव राय

‘गुप्त’ जस्ता फिल्म निर्देशनका लागि चिनिने निर्माता राजीव रायले सन् १९९७ मा खतरनाक परिस्थितिको सामना गर्नुपरेको थियो । अबु सलेम गिरोहसँग कथित रूपमा सम्बन्धित पाँच जना आक्रमणकारीले मध्य मुम्बईमा उनीमाथि आक्रमण गरेका थिए ।

राजीव आफ्नो कार्यालयबाट बाहिर निस्कँदै गर्दा आक्रमणकारीहरूले गोली चलाएका थिए । यसअघि नै धम्की पाएकाले प्रहरीले उनको सुरक्षाका लागि अंगरक्षक खटाएको थियो । ती अंगरक्षकले बीचमा आएर आक्रमणकारीको सामना गरे र उनीहरूलाई भगाउन सफल भए । उक्त घटनामा एक आक्रमणकारी घाइते भएको बताइन्छ ।

बिबिसीबाट