माओवादीको आरोप- गृहमन्त्रीकै संलग्नतामा विमानस्थलमा तस्करी

News Summary

Generated by OK AI. Editorially reviewed.

नेकपा माओवादी केन्द्रका सांसद झक्कुप्रसाद सुवेदीले गृहमन्त्री रमेश लेखकको सचिवालयको संलग्नतामा त्रिभुवन विमानस्थलमा भ्रष्टाचार भएको आरोप लगाए।
सुनुवाइमा उनले भिजिट भिसा सेटिङ प्रकरणले देशको छवि निहुरिएको बताए र मानव तस्करी भएको आरोप लगाए।
उनीहरूले गृहमन्त्रीको भाषण र आचरणमा अन्तर रहेको टिप्पणी गरे।

१४ जेठ, काठमाडौं । नेकपा माओवादी केन्द्रका सांसद झक्कुप्रसाद सुवेदीले गृहमन्त्री रमेश लेखकको सचिवालयको प्रत्यक्ष संलग्नतामा त्रिभुवन विमानस्थलमा भ्रष्टाचार भइरहेको आरोप लगाएका छन् ।
राष्ट्रिय सभाको बुधबारको बैठकमा बोल्दै सांसद सुवेदीले यस्तो आरोप लगाएका हुन् ।

‘यतिखेर फेरि भिजिट भिसा सेटिङ प्रकरणले थप शीर निहुर्‍याएको छ । बेरोजगार नागरिक बेचेर पैसा असुल्ने कस्तो देश बनायौं हामीले ? यो दुःखद कुरा हो,’ उनले भने, ‘गृह मन्त्रालयको उच्च नेतृत्वको संलग्नतामा मानव तस्करी भएको छ । हाम्रो देशको छवि अब कस्तो होला ?’

भुटानी शरणार्थी प्रकरणले देशको शीर निहुरिएको बेलामा भिजिट भिसा सेटिङ प्रकरणले थप शीर निहुर्‍याएको टिप्पणी गरे ।

भिजिट भिसाको आवरणमा भएको तस्करीमार्फत गृहमन्त्री आफू संलग्न रहेपनि कर्मचारीलाई दोष दिएर उम्किन खोजेको उनको आरोप छ ।

‘मुलभूतरुपमा गृहमन्त्रीको सचिवालयको प्रत्यक्ष संलग्नतामा त्रिभुवन विमानस्थलमा भ्रष्टाचार भइरहेको । त्यो पनि थोरै रकम हैन दिनमा पचास लाख रुपैयाँसम्म उठाइरहेको भन्ने जो चर्चा छ,’ उनले भने, ‘यो अहिले सर्वाधिक चर्चाको विषय छ । हामीलाई थाहा छ कुनैदिन भुटानीशरणार्थी प्रकरणले देशको शीर निहुँर्‍यायो । कम्तिमा पनि छ महिनासम्म यसबारे देशविदेशमा बहस चल्यो ।’

गृहमन्त्री लेखकले भाषण अर्कै गर्ने गरेको तर आचरण ठिक नरहेको टिप्पणी समेत उनले गरे ।