भृकुटीमण्डपमा मह मेला सुरु

News Summary

Generated by OK AI. Editorially reviewed.

काठमाडौंको भृकुटीमण्डपमा छैटौं मह मेला आजदेखि सुरु भएको हो।
कृषिमन्त्री रामनाथ अधिकारीले महमा गुणस्तर कायम गर्न आवश्यक रहेको बताए।
नेपालमा वार्षिक ५ हजार टनभन्दा बढी मह उत्पादन हुने गरेको छ।

२२ जेठ, काठमाडौं । राजधानीको भृकुटीमण्डपमा आज बिहीबारदेखि छैटौं मह मेला सुरु भएको छ । कृषि तथा पशुपन्छी विकासमन्त्री रामनाथ अधिकारीले मह मेला उद्घाटन गरे ।

‘आत्मनिर्भर मौरी व्यवसायी, सक्षम, सुदृढ महासंघ, नेपाली मौरीजन्य उपजको संसारभर पहिचान’ भन्ने नारासाथ मह मेला सुरु भएको हो । २४ जेठसम्म मेला चल्ने नेपाल मौरीपालक महासंघले जनाएको छ ।

मेलामा विभिन्न तरिकाले उत्पादन भएको मह, महका चाका, घारसमेत प्रदर्शनीमा राखिएको छ । भिर मौरी, घार मौरी, वन मौरी लगायत जातीका मौरीबाट उत्पादित मह मेलामा राखिएका छन् ।

‘महमा गुणस्तर भए बजार बढ्छ’

मह मेला उद्घाटन गर्दै कृषिमन्त्री अधिकारीले महमा गुणस्तर कायम गरे आयातित महले बजार खोस्न नसक्ने बताएका छन् । ‘खुला बजारमा सबैले प्रतिस्पर्धा गर्न पाउँछ । त्यसकारण शुद्ध मह उत्पादनलाई पहिलो प्राथमिकता दिन जरुरी छ,’ उनले भने ।

बैंक तथा वित्तीय संस्थालाई मौरी किसानमा पनि लगानी गर्न आग्रह गर्दै उनले मौरीपाकलाई देखिएको चरनको समस्या समाधान गर्न पहल गर्ने बताए ।

मह उत्पादकलाई उत्पादनमा जोड दिनुपर्ने भन्दै उनले बजारको समस्या बिस्तारै हटाउन सरकारले पहल गरिरहेको बताए ।

मौरीपालक महासंघका अनुसार नेपालमा वार्षिक ५ हजार टनभन्दा बढी मह उत्पादन हुने गरेको छ । स्वदेशी मह उत्पादन बढेसँगै सरकारले हाल मह आयातमा रोक लगाएको छ ।