बुढीगंगाका मेयर भन्छन्- डोजर र ट्यांकरको सहयोगमा बाम्काको आगो निभाउँदैछौं

News Summary

Generated by OK AI. Editorially reviewed.

बाजुराको बुढीगंगा नगरपालिकामा आगलागीले ४० वटा पसल जलेको मेयर राम बहादुर बानियाँले बताए।
आगलागी नियन्त्रण गर्न दमकलको अभावमा डोजर र पानीट्यांकरको प्रयोग गरिएको छ।
प्रहरीले १६/१७ वटा पसल जलेको जानकारी दिएको र आगलागी दिउँसो ३ बजेर ५५ मिनेटमा लागेको हो।

२३ जेठ, काठमाडौं । बाजुराको बुढीगंगा नगरपालिकाका मेयर राम बहादुर बानियाँले वडा नम्बर ६ स्थित बाम्का बजारमा लागेको आगलागीबाट ४० वटा पसलहरू जलेको जानकारी गराएका छन् ।

आगलागीस्थलमै रहेको मेयर बानियाँले त्यहाँको अवस्थाबारे जानकारी गराउँदै अनलाइनखबरसँग भने, ‘निकै ठूलो आगलागी भएको छ । कम्तीमा ४० वटा पसल पूर्ण रुपमा ध्वस्त भएको छ । क्षति यकिन भएको छैन ।’

उनका अनुसार आगलागीबाट कुनै मानवीय क्षति भएको छैन । दमकल पालिकामा उपलब्ध नभएको पनि उनले बताए ।

‘दमकल नभएर डोजर र पानीट्यांकरको सहयोगमा आगलागी नियन्त्रणको प्रयास भइरहेको छ । नियन्त्रण हुन लागेको छ,’ उनले भने ।

बम्का बजारमा रहेको नवदुर्गा होटलमा ग्यास सिलिन्डर पड्किएर आगलागी भएको जिल्ला प्रहरी कार्यालय, बाजुराले जानकारी दिएको छ ।

प्रहरीले भने १६/१७ वटा मात्रै पसल जलेको जानकारी गराएको छ । यद्यपि यसको विवरण अद्यावधिक गर्ने क्रममा रहेको जिल्ला प्रहरी कार्यालयका एक अधिकृतले अनलाइनखबरलाई जानकारी दिए ।
प्रहरीका अनुसार दिउँसो ३ बजेर ५५ मिनेटमा आगो लागेको थियो ।

प्रहरी निरीक्षाक देव बहादुर चौधरीको कमाण्डमा ३२ जना प्रहरी सो क्षेत्रमा खटिएको जनाइएको छ ।