सरकारले केही पनि गरेको छैन नभनौं : पदम गिरी

News Summary

Generated by OK AI. Editorially reviewed.

नेकपा एमालेका सांसद पदम गिरीले सरकारले केही पनि गरेको छैन भन्ने भाष्य गलत रहेको दाबी गरेका छन्।
गिरीले प्रतिनिधिसभाको बैठकमा यथार्थ जनतालाई बताउनुपर्ने र कमजोरी औंल्याउन सक्नुपर्ने बताए।
उनले सुशासनमा काम हुन नसकेको स्वीकार गर्दै लगानी वातावरण बनाउन आवश्यक रहेको बताए।

३१ असार, काठमाडौं । नेकपा एमालेका सांसद पदम गिरीले सरकारले केही पनि गरेको छैन भन्ने भाष्य बनाउन खोजिएको र यो गलत रहेको दाबी गरेका छन् ।

मंगलबार प्रतिनिधिसभाको बैठकमा बोल्दै उनले यस्तो बताएका हुन् । अहिले नकारात्मक मात्रै कुरा हुने, सबै अस्तव्यस्त भयो, देश बर्बाद भयो, देश डुब्न लाग्यो, देशमा भविष्य छैन भन्ने प्रकारले प्रस्तुत हुने प्रवृति रहेको बताए । यसलाई चिर्न सक्नुपर्ने उनको आग्रह छ ।

‘यथार्थ के हो आम जनतालाई बताउन सक्नुपर्छ । यो सदन यसमा केन्द्रित हुनुपर्छ’ गिरी भन्छन्, ‘ जहाँ चुकेको छ, जहाँ कमजोरी भएको छ त्यहाँ निर्ममतापूर्वक औंल्याउन पनि सक्नुपर्छ, सरकारलाई घचघच्याउन सक्नुपर्दछ ।’

सुशासनको मामिलामा जसरी काम गर्न सक्नुपर्ने थियो त्यसरी काम हुन नसकेको स्वीकार गर्न सकिने पनि उनले बताए । जनतामा निराशा रहेको पनि उनले बताए । लगानीका लागि वातावरण अझै बनाउन आवश्यक रहेको बताए । काम गर्नुपर्ने धेरै रहेको र सरकारले प्रयास गरिरहेको उनको भनाइ छ ।