उमेरहदको विषयमा एमाले बैठकमा उठ्यो प्रश्न, नेताहरूले बोल्ने क्रम जारी

५ साउन, काठमाडौं । नेकपा एमालेको जारी केन्द्रीय कमिटी बैठकमा सदस्यहरूले बोल्ने क्रम जारी छ ।

बैठक स्रोतका अनुसार, गण्डकी प्रदेशका केन्द्रीय सदस्यहरूले आ–आफ्नो धारणा राखिसकेका छन् । अहिले मधेश प्रदेशका सदस्यहरू बोल्न थालेका छन् ।

उपाध्यक्ष विष्णु पौडेलले प्रस्तुत गरेको विधान संशोधन प्रस्ताव र महासचिव शंकर पोखरेलले प्रस्तुत गरेको संगठनात्मक प्रतिवेदनमाथि नेताहरूले धारणा राखिरहेका हुन् ।

अहिलेसम्म धारणा राखेका मध्ये अधिकांशले पार्टी अध्यक्ष केपी शर्मा ओलीकै पक्षमा बोलेका छन् । पूर्वराष्ट्रपति विद्यादेवी भण्डारीको राजनीतिक सक्रियताबारे केही नेताहरूले सकारात्मक धारणा राखे पनि अधिकांश नेताले ओलीकै पक्षमा बोलेका हुन् ।

केन्द्रीय सदस्य दिवाकर देवकोटाले उमेर हदको विषयमा प्रश्न उठाएका छन् । उनले पहिले ७० वर्षे उमेरहद राख्नु र अहिले हटाउनुपर्नेको कारण खोजी गरेका छन् ।

‘पहिले किन उमेर हद राखियो ? अहिले किन हटाइयो ?,’ देवकोटाले बैठकमा प्रश्न गरे ।

त्यस्तै, अर्का केन्द्रीय सदस्य कृष्ण पौडेलले पार्टी नेतृत्वकै कारण कार्यकर्तामा निराशा छाएको बताए । केन्द्रीय सदस्य रामपृत रामले नेताहरूले गुटबन्दी गरेका कारण आफूहरूलाई स्थानीय स्तरमा काम गर्न कठिन भएको बताए ।

नेताहरूले बोल्ने क्रम जारी छ । बैठक भोलिसम्म चल्ने बताइएको छ । प्रत्येक केन्द्रीय सदस्यलाई ३/३ मिनेटको बोल्ने समय दिइएको छ ।