बलात्कार पीडित युवतीविरुद्ध मधेश प्रदेशका पूर्वप्रमुख अहिराजले नै हाले मुद्दा

News Summary

Generated by OK AI. Editorially reviewed.

मधेश प्रदेशका पूर्वप्रमुख राजेश अहिराजले आफूलाई बलात्कारको जाहेरी दिने युवतीविरुद्ध आपराधिक लाभको कसुरमा मुद्दा दायर गरेका छन्।
अहिराजले धम्क्याउँदै २० लाख मागेको र नदिएपछि सामाजिक रुपमा बदनाम गर्ने धम्की दिएको दाबी गरेका छन्।
४ जेठ २०८१ मा काठमाडौं नयाँ बानेश्वरमा अहिराजले बलात्कार गरेको पीडित युवतीले आरोप लगाएकी छन्।

१४ साउन, काठमाडौं । बलात्कार आरोपमा पक्राउ परेका मधेश प्रदेशका पूर्वप्रमुख राजेश अहिराज भनिने राजेश झाले नै आफूलाई बलात्कारको जाहेरी दिने युवतीविरुद्ध मुद्दा हालेका छन् ।

अहिराजले दिएको जाहेरीको अनुसन्धान कसेर आज बुधबार काठमाडौं जिल्ला अदालतमा मुद्दा दायर भएको छ । अहिराजबाट पीडित भएकी युवतीविरुद्ध अहिराजकै जाहेरीका आधारमा आपराधिक लाभको कसुरमा मुद्दा दायर भएको हो ।

धम्क्याउँदै २० लाख मागेको र नदिएपछि सामाजिक रुपमा बदनाम गर्नेदेखि आत्महत्या गर्नेसम्म धम्की दिँदै रकम लिएको दाबी अहिराजको छ ।

सुरुमा २० लाख माग गरेकोमा आफूले नगदै तीन लाख रुपैयाँ दिएको दाबी अहिराजले गरेका छन् । बलात्कार पीडित युवतीले जाहेरी दिएपछि अहिराजले पनि ती युवतीविरुद्ध आपराधिक लाभको जाहेरी दिएको पाइएको छ ।

उक्त जाहेरीको अनुसन्धान सकेर बलात्कार पीडित युवतीलाई फरार आरोपी बनाउँदै मुद्दा दायर भएको हो । यता अहिराजविरुद्ध मंगलबार नै काठमाडौं जिल्ला अदालतमा बलात्कारको कसुरमा मुद्दा दायर भएको छ ।

४ जेठ २०८१ मा काठमाडौंको नयाँ बानेश्वरस्थित आफ्नै डेरामा अहिराजले बलात्कार गरेको पीडित युवतीको आरोप छ । एक्लै कोठामा बसेका बेला अहिराजले आएर बलात्कार गरेको पीडितको भनाइ छ ।