बाढीपहिरोले काठमाडौं-हेटौंडा जोड्ने दुई सडकखण्ड अवरुद्ध

News Summary

Generated by OK AI. Editorially reviewed.

कान्तिलोकपथ र त्रिभुवन राजपथ सडकखण्ड मकवानपुरको भिमफेदी गाउँपालिकामा पहिरो र भेलबाढीले अवरुद्ध भएका छन्।
शुक्रबार दिउँसो सवा ३ बजेको समयमा बागझुरास्थित त्रिभुवन राजपथमा भेलबाढीले सडक पूर्ण रूपमा अवरुद्ध भएको मकवानपुर प्रहरीले जनाएको छ।
पहिरो पन्छाउन प्रहरी टोली परिचालन भए पनि लगातार पानी परिरहेको कारण सडक खुलाउन समस्या भइरहेको छ।

६ भदौ, काठमाडौं । काठमाडौं- हेटौंडा जोड्ने कान्तिलोकपथ र त्रिभुवन राजपथ सडकखण्ड अवरुद्ध भएका छन् ।

मकवानपुर प्रहरीका अनुसार कान्ति लोकपथ सडकखण्ड अन्तर्गत मकवानपुरको भिमफेदी गाउँपालिका-८ स्थित भर्‍याङ डाँडा र त्रिभुवन राजपथ अन्तर्गत भिमफेदी गाउँपालिका-१ स्थित बागझुरामा पहिरो खस्दा सडक अवरुद्ध भएको हो ।

शुक्रबार दिउँसो सवा ३ बजेको समयमा बागझुरास्थित त्रिभुवन राजपथ सडक खण्डमा गिटी बालुवासहितको भेलबाढी आउँदा सडक पूर्ण रूपमा अवरुद्ध बनेको प्रहरीले जनाएको छ ।

यसैगरी वर्षाका कारण सडकमाथिबाट ढुंगामाटो सहितको पहिरो खस्दा कान्तिलोकपथ सडक खण्ड अवरुद्ध बनेको प्रहरीले जनाएको छ ।

पहिरो गएर सडक अवरुद्ध बनेको खबर थाहा पाउने बित्तिकै सडक खुलाउन प्रहरी टोली परिचालन भएको छ । तर पानी परिरहेका कारण पहिरो पन्छाउन समस्या भइरहेको प्रहरीले जनाएको छ ।