उखु किसान र कवाड व्यवसायीलाई देखाएर सांसदहरूले भने- हाम्रो बेइज्जत भयो

१३ भदौ, काठमाडौं । उखु किसानको आन्दोलन र कवाड व्यावसायीहरूको आन्दोलनको विषय प्रतिनिधि सभामा उठेको छ । किसानहरू भुक्तानी मागेर माइतीघर मण्डलामा प्रदर्शन गरिरहेका छन् । कवाड व्यवसायीहरू व्यवसायमा अवरोध हुने गरी सरकारले गतिविधि गरेको भनेर असन्तुष्ट छन् । उनीहरू पनि आन्दोलनमा छन् ।

दुवै आन्दोलनको विषयले प्रतिनिधि सभामा शुक्रबार प्रवेश पाएको हो । सत्तापक्ष र प्रतिपक्ष दुवैतर्फका सांसदहरूले यो विषय उठाएका छन् ।

‘उखु किसान आन्दोलनमा छन् । कवाड श्रमिकको दु:ख पनि सुनिरहेका छौं,’ नेकपा एमालेका सांसद ठाकुर गैरेले भने, ‘उखु किसान र कवाड व्यावसायीले राखेका जायज माग तत्काल सम्बोधन गर्न माग गर्दछु ।’

नेकपा माओवादी केन्द्रका सांसद देवेन्द्र पौडेलले उखु किसानले प्रत्येक वर्ष जस्तो आन्दोलन गर्नुपर्ने अवस्था लाजमर्दो रहेको बताए । ‘हाम्रो बेइज्जत भइसक्यो,’ उनले भने ।

सरकारले पैसा छैन भनेर उखु किसानलाई पैसा दिन नसक्ने जवाफ दिनुले राज्यको चरित्र र प्राथमिकता देखाएको सांसदहरूको आरोप छ ।

राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्रबहादुर शाही दुई तिहाइ बहुमतको सरकारले समेत काम गर्न सक्दैन भने कसले गर्छ भनेर प्रश्न उठ्ने बताए ।

शुक्रबार प्रतिनिधि सभाको बैठकमा बोल्दै उनले भने, ‘उखु किसानको पैसा दिन सक्दैन भने यो सरकार कसरी दुई तिहाइ ?’

नेताहरू उखु किसानले आन्दोलन गरिरहेको स्थल काठमाडौंको माइतीघरमा माइतीघर जाने गरेको तर, उनीहरूलाई पैसा दिन सरकारलाई दबाब दिनेमा कमैको मात्र ध्यान पुगेको उनले बताए ।

आम जनता पार्टी (आजपा)का अध्यक्ष प्रभु साहले शहरको सुन्दरताका लागि काम गरिरहेका कवाड व्यवसायी सम्मानित हुनुपर्नेमा राज्यबाट दण्डित हुने वातावरण उचित नरहेको भनेर सांसद साहले सरकारको ध्यानाकर्षण गरे ।

सांसदहरू एनपी साउद, अच्युत प्रसाद मैनाली, किसान श्रेष्ठ, शक्ति बस्नेत, नागिना यादव र माधव सकापकोटा लगायतले समेत उखु किसान र कवाड व्यवसायीहरूको आन्दोलनप्रति सरकारको ध्यानाकर्षण गरे ।