बूढानीलकण्ठ नगरपालिकाले भन्यो : जलेका नोटमा कारोबार नगर्नू

News Summary

Generated by OK AI. Editorially reviewed.

काठमाडौंको बूढानीलकण्ठ नगरपालिकाले जलेका पैसाका नोटहरूको कारोबार नगर्न व्यवसायीलाई आग्रह गरेको छ।
नगरपालिकाले जलेका नोटबाट कारोबार भएमा कार्यालय वा नजिकको प्रहरी कार्यालयमा खबर गर्न अनुरोध गरेको छ।
भदौ २४ गतेका प्रदर्शनका क्रममा जलेका नोट भेटिएको भिडियो सार्वजनिक भए पनि कांग्रेस सभापति देउवाको सचिवालयले खण्डन गरेको छ।

३ असोज, काठमाडौं । काठमाडौंको बूढानीलकण्ठ नगरपालिकाले जलेका पैसाका नोटहरूको कारोबार नगर्न आग्रह गरेको छ ।

नगरपालिकाले एक सूचना जारी गर्दै जलेका नोटहरूबाट कारोबार भए गरेको पाइएमा नगरपालिकाको कार्यालय वा नजिकको प्रहरी कार्यालयमा खबर गर्न आग्रह गरेको छ ।

भदौ २४ गते जेनजी प्रदर्शनका क्रममा काठमाडौं उपत्यकाका विभिन्न क्षेत्रमा नेता र व्यवसायीका घर तथा प्रतिष्ठानमा भएको आगजनीका क्रममा जलेका नोटहरू भेटिएको भिडियोहरू सार्वजनिक भएका थिए ।

बूढानीलकण्ठमा पनि कांग्रेस सभापति शेरबहादुर देउवा निवासमा प्रदर्शनकारीले आगजनी गरेपछि जलेका नोट भेटिएको समाचार तथा भिडियोहरू आएका थिए ।

यद्यपि सभापति देउवाको सचिवालयले ती भिडियोलाई कपोकल्पित र भ्रामक भन्दै खण्डन गरेको छ ।

प्रदर्शनकारीले आन्दोलनको फाइदा उठाउँदै लुटपाट मच्याएको समाचार सार्वजनिक भइरहेका बेला बूढानीलकण्ठ नगरपालिकाले नगरभित्र व्यवसाय सञ्चालन गर्ने व्यवसायीलाई जलेका नोटमा कारोबार नगर्न आग्रह गरेको छ ।