कलाकारसँगको भेटमा प्रधानमन्त्रीले भनिन्– गालीसँग डराउँदैनौं

काठमाडौं । प्रधानमन्त्री सुशीला कार्कीले असल नियतले काम गर्दागर्दै कसैले गाली गर्छ भने त्यस्ता गालीसँग नडराउने बताएकी छन् । आज कलाकारहरुसँगको भेटमा उनले सो कुरा बताएकी हुन् ।

‘असल नियतले काम गर्दागर्दै कसैले गाली गर्छ भने त्यस्ता गालीसँग डराउँदैनौं हाम्रो उद्देश्य र लक्ष्यमा हामी स्पष्ट छौं,’ उनले भनिन् ।

प्रधानमन्त्री कार्कीलाई भेट्न समकालीन नेपाली सिनेमाका चर्चित ९ जना कलाकारहरु बालुवाटारस्थित निवास पुगेका थिए । भेटघाटमा कलाकार तथा सर्जकहरू ऋचा शर्मा, निश्चल बस्नेत, विजय बराल, विपिन कार्की, सुजित बिडारी, शान बस्न्यात, दिव्यदेव पन्त, कालीप्रसाद बाँस्कोटा, कर्मालगायतको उपस्थिति थियो ।

भेटघाटमा गृहमन्त्री ओम प्रकाश अर्यालका साथै कलाकारहरुसँगको भेटघाटको संयोजन गरेका पुकार बम पनि सहभागी थिए ।

उनीहरुसँगको छलफलमा प्रधानमन्त्री कार्कीले दुष्प्रचार चिर्नका लागि भूमिका खेल्न अनुरोध गरिन् । उनले भनिन्, ‘साथ सहयोग सबैको चाहिन्छ । समाजमा तपाईंहरूको प्रभाव छ । दुष्प्रचार चिर्नका लागि तपाईंहरूले पनि भूमिका खेलिदिनुहोस् ।’

उनले सरकारका केही कमी कमजोरी भए त्यो पनि औंल्याइदिन अनुरोध गरिन् ।