सुदूरपश्चिममा ४६ हजार नयाँ मतदाता थपिए

News Summary

Generated by OK AI. Editorially reviewed.

सुदूरपश्चिम प्रदेशमा २१ फागुनको प्रतिनिधि सभाको निर्वाचनका लागि ४६ हजार २० मतदाता नामावलीमा थपिएका छन्।
मतदाता थप्नेमा कैलाली सबैभन्दा अगाडि छ जहाँ १८ हजार २१३ जना नयाँ मतदाता दर्ता भएका छन्।
कम मतदाता थपिएको बाजुरामा १ हजार ५१७ जना र अन्य जिल्लामा पनि हजारौं मतदाता थपिएको निर्वाचन कार्यालयले जनाएको छ।

८ मंसिर, धनगढी । सुदूरपश्चिम प्रदेशमा ४६ हजार नयाँ मतदाता थपिएका छन् । २१ फागुनमा तय भएको प्रतिनिधि सभाको निर्वाचनका लागि निर्वाचन आयोगले मतदाता नामावलीमा नाम दर्ताका लागि दिएको समयसीमा भित्र ४६ हजार २० मतदाता थपिएको प्रदेश निर्वाचन कार्यालयले जनाएको छ ।

निर्वाचन कार्यालयका सूचना अधिकारी राजेश चौधरीले २९ हजार ४३९ जनाले राष्ट्रिय परिचयपत्र र बाँकी १६ हजार ५८१ जनाले सम्बन्धीत निर्वाचन कार्यालयमै पुगेर मतदाता नामावलीमा नाम दर्ता गराएको बताए ।

उनकाअनुसार सबैभन्दा मतदाता कैलालीमा थपिएका छन् भने कम बाजुरामा रहेका छन् । कैलालीमा १८ हजार २१३ जनाले मतदाता नामावलीमा नाम दर्ता गराएको चौधरीले बताए । सबैभन्दा कम रहेको बाजुरामा एक हजार ५१७ जना थपिएका छन् ।

कैलालीपछि क्रमश: कञ्चनपुरमा १२ हजार २९१, बैतडीमा दुई हजार ६५२, दार्चुलामा दुई हजार ६२८, अछाममा दुई हजार ६०४, बझाङमा दुई हजार ३४५, डडेल्धुरामा एक हजार ८९२ र डोटीमा एक हजार ८७८ जना मतदाता थपिएका छन् ।