भन्सारमा पैठारी शुल्क तिरेका छिमेकी देशका सवारीले नेपालमा थप शुल्क तिर्नु नपर्ने

News Summary

Generated by OK AI. Editorially reviewed.

अन्तरसरकारी वित्त परिषद्ले छिमेकी देशका पर्यटक सवार सवारीसाधनबाट नेपालभित्र थप शुल्क नलिने निर्णय गरेको छ।
पर्यटन प्रोत्साहनका लागि भन्सार बिन्दुमा अस्थायी पैठारी शुल्क तिरेपछि अन्य शुल्क नलिने व्यवस्था मिलाइएको छ।
परिषद्ले सबै प्रदेशको वित्तीय र राजस्वसम्बन्धी कानुनमा सामञ्जस्य कायम गर्ने निर्णय पनि गरेको छ।

१६ मंसिर, काठमाडौं । भन्सार बिन्दुमा अस्थायी पैठारी शुल्क तिरेका छिमेकी देशका पर्यटक सवार सवारीसाधनसँग नेपालभित्र थप शुल्क लिन नपाइने भएको छ ।

शुक्रबार बसेको अन्तरसरकारी वित्त परिषद् बैठकले यस्तो निर्णय गरेको हो । छिमेकी देशका पर्यटकलाई प्रोत्साहन गर्न यस्तो निर्णय गरिएको अर्थ मन्त्रालयले जनाएको छ ।

‘छिमेकी देशका पर्यटकलाई प्रोत्साहन गर्न नेपाल प्रवेश गर्ने सवारीले भन्सार बिन्दुमा अस्थायी पैठारी शुल्क तिरेपछि तोकिएको दिनसम्म निर्वाध नेपालभित्र अन्य कुनै शुल्क नलिई सहज आवागमन हुने व्यवस्था मिलाउने,’ निर्णयमा छ ।

पर्यटन व्यवसायीले लामो समयदेखि विभिन्न तहका सरकारले पर्यटक सवारीसँग अतिरिक्त शुल्क लिने गरेको गुनासो गर्दै आएका थिए । परिषद् बैठकले सबै प्रदेशको वित्तीय लगायत राजस्वसँग सम्बन्धित कानुनमा सामञ्जस्य कायम गर्ने निर्णय समेत गरेको छ ।