अनलाइनलाई माध्यम बनाएर यौन दुर्व्यवहार बढ्दै

News Summary

Generated by OK AI. Editorially reviewed.

साइबर ब्यूरो भोटाहिटीका अनुसार डिजिटल हिंसासँग सम्बन्धित आठ उजुरीमध्ये एउटा अनलाइनबाट यौन दुर्व्यवहारसँग सम्बन्धित छ।
प्रहरी नायव निरीक्षक राधिका ठकुरीले महिलाहरू पुरुषको तुलनामा बढी डिजिटल हिंसामा पीडित रहेको बताउनुभयो।
किशोरीहरूलाई लक्षित गरी सामाजिक सञ्जालमा प्रलोभन देखाएर अनलाइनबाट यौन दुर्व्यवहार र ठगीको घटनाहरू बढ्दो छन्।

१८ मंसिर, काठमाडौं । सामाजिक सञ्जालका विभिन्न प्लाटफर्मलाई माध्यम बनाएर यौन दुर्व्यवहारजन्य गतिविधि र त्यसबाट पीडित हुनेहरू बढ्दो क्रममा रहेको प्रहरीले जनाएको छ ।

साइबर ब्यूरो भोटाहिटीको तथ्यांकअनुसार डिजिटल हिंसासँग सम्बन्धित आठ वटा उजुरीमध्ये एउटा अनलाइनबाट यौन दुर्व्यवहारसँग सम्बन्धित छ ।

साइबर ब्यूरो भोटाहिटीमा कार्यरत प्रहरी नायव निरीक्षक राधिका ठकुरी डिजिटल हिंसामा पुरुषको तुलनामा महिला बढी पीडित रहेको बताउँछिन् । यसमा पनि बालिकाहरूमाथि अनलाइनबाट यौनजन्य दुर्व्यवहार हुने गरेको छ ।

लैंगिक हिंसाविरुद्धको १६ दिने अभियान अन्तर्गत तरंगिनी महिला अधिकार प्रशिक्षण केन्द्रले बुधबार काठमाडौंमा अन्तरक्रियात्मक कार्यक्रम राखेको थियो । उक्त कार्यक्रममा प्रस्तुतीकरण गर्दै प्रहरी नायव निरीक्षक राधिका ठकुरीले साइबर ब्यूरोमा पर्ने उजुरीको अवस्था र त्यसको प्रवृत्तिबारे जानकारी गराएकी थिइन् ।

उनका अनुसार किशोरीहरू लक्षित गरेर हिंसाजन्य कार्य हुनेक्रम बढ्दो छ । सामाजिक सञ्जालमार्फत किशोरीहरूसँग जोडिने र नग्न फोटो लिएर त्यसैलाई दुरुपयोग गरेर यातना दिने कार्य फैलिँदो छ । यस्तो हुँदा कतिपय किशोरीहरू डिप्रेसनमा समेत पुग्ने गरेको समेत छ ।

तथ्यांकमा उल्लेख भएअनुसार कक्षा ९/१० पढ्ने बालबालिकासँग अनलाइलाइनबाट जोडिने र अनलाइनमै कुरा गरेर प्रलोभन देखाएर फसाउने प्रवृत्ति बढ्दो छ ।

अनलाइनमा परिचय भएको आधारमै प्रेमविवाह गरी अर्को देशमा पुर्‍याउने र सेक्स वर्करको रूपमा काममा लगाउने प्रवृत्ति समेत देखिएको छ ।

यसबाहेक डिजिटल ठगी पनि उत्तिकै बढ्दो छ । प्रहरी नायव निरीक्षक ठकुरीका अनुसार विदेशबाट सामान पठाएको र एयरपोर्टमा कर तिर्नका लागि केही पैसा भनेर माग्नेदेखि पुरस्कार परेको भनेर छक्याएर पैसा ठगीका घटनाहरू पाइएका छन् ।