कोशी प्रदेश सभा बैठकमा ओली-लेखक रिहाइको माग

News Summary

Generated by OK AI. Editorially reviewed.

कोशी प्रदेशका सांसदहरूले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको राजनीतिक प्रतिशोधका आधारमा पक्राउ भएको भन्दै रिहाइको माग गरेका छन्।
भदौ २३ र २४ गतेको घटना छानबिन गर्न बनेको आयोगको प्रतिवेदन पूर्वाग्रही रहेको सांसदहरूले दाबी गरेका छन्।
सांसदहरूले नयाँ सरकारले फरक विचार राख्ने नेताहरूप्रति राजनीतिक प्रतिशोध साध्न थालेको भन्दै यसले देशमा अस्थिरता ल्याउने चेतावनी दिएका छन्।

१५ चैत, विराटनगर । कोशी प्रदेशका सांसदहरूले पूर्वप्रधानमन्त्री तथा नेकपा एमाले अध्यक्ष केपी शर्मा ओली र पूर्वगृहमन्त्री तथा नेपाली कांग्रेस नेता रमेश लेखकको रिहाइको माग गरेका छन् ।

भदौ २३ र २४ गतेको घटना दमन गरेको आरोपमा एमाले अध्यक्ष ओली र कांग्रेस नेता लेखक शनिबार पक्राउ परेका थिए । आइतबारको प्रदेशसभा बैठकमा बोल्दै सांसदहरूले राजनीतिक प्रतिशोधका आधारमा पक्राउ गरेको भन्दै रिहाइको माग गरेका हुन् ।

भदौ २३ र २४ गतेको घटना छानबिन गर्न बनेको आयोगको प्रतिवेदन पूर्वाग्रही रहेको सांसदहरूको दाबी छ ।

बैठकको शून्य समयमा बोल्दै सांसद डोल्मा तामाङ, सिर्जना राई, किशोरचन्द्र दुलाल,मीना श्रेष्ठ,गीतादेवी रेग्मी,खगेश्वरी पौडेल र होमबहादुर थापाले नयाँ सरकारले गठन भएको २४ घण्टा नबित्दै धरपकड सुरु गर्नु गलत भएको भन्दै पक्राउ परेका नेताको रिहाइको माग गरे ।

नयाँ सरकारले फरक विचार राख्ने नेताहरूप्रति राजनीतिक प्रतिशोध साध्न थालेको भन्दै सांसदहरूले यसले देशमा अस्थिरता ल्याउने चेतावनी दिए ।

बैठकको विशेष समय लिएर बोल्दै एमाले सांसद तिलकुमार मेन्याङ्बोले नेताहरूको गिरफ्तारी आपत्तिजनक भएको बताए ।

राजनीतिक इतिहासमा ठुला परिवर्तनपछि उठेका विषयलाई दलहरूले सावधानीपूर्वक हल गर्दै आएको इतिहास रहेको बताउँदै उनले धरपकड नगर्न आग्रह गरे ।

उनले भदौ २३ र २४ को घटना छानविन गर्न बनेको आयोगको प्रतिवेदनले देशलाई द्वन्द्वमा धकेल्ने काम गरेको बताए ।