भृकुटीमण्डपमा तेस्रो ‘नेसनल हर्टिकल्चर एक्स्पो’ हुँदै

News Summary

Generated by OK AI. Editorially reviewed.

नेपाल नर्सरी व्यवसायी संघको आयोजनामा काठमाडौं भृकुटीमण्डपमा १९ चैतदेखि २३ चैतसम्म तेस्रो नेसनल हर्टिकल्चर एक्स्पो २०८२ सुरु हुँदैछ।
एक्स्पोमा ६५ भन्दा बढी स्टलमा ७ सयभन्दा बढी प्रजातिका बोटबिरुवा, मलखाद, विषादी, गमला र प्रविधि प्रदर्शनी गरिनेछ।
संघले यस वर्ष करिब ५१ हजारले अवलोकन गर्ने र १ करोड ५० लाखभन्दा बढी व्यावसायिक कारोबार हुने अनुमान गरेको छ।

१८ चैत, काठमाडौं । भोलि बिहीबारदेखि काठमाडौंमा तेस्रो ‘नेसनल हर्टिकल्चर एक्स्पो २०८२’ सुरु हुँदैछ ।

नेपाल नर्सरी व्यवसायी संघको आयोजनामा नर्सरी व्यवसायको विकास र विस्तारका साथै प्रोत्साहन गर्ने उद्देश्यसाथ बिहीबारदेखि २३ चैतसम्म काठमाडौं भृकुटीमण्डपमा एक्स्पो हुन लागेको हो ।

एक्स्पोमा देशभरिका नर्सरी व्यवसायीहरूका व्यवसायिक स्टल, सूचनामूलक स्टल, प्रतिस्पर्धा स्टल लगायत गरी ६५ भन्दा बढी स्टल रहने आयोजकले जनाएको छ ।

एक्स्पोमा ७ सयभन्दा बढी प्रजातिका बोटबिरुवा प्रदर्शन तथा बिक्री वितरणका लागि राखिने छ ।

आयोजकका अनुसार मलखाद, अर्गानिक एवं रासायनिक विषादी, बिउबिजन, गमला, औजार उपकरण तथा प्रविधि समेत प्रदर्शनी हुनेछ ।

यसैगरी एक्स्पो अवधिमा उत्कृष्ट प्रस्तुतिका आधारमा विभिन्न विधामा पुरस्कार वितरण गरिने संघले जनाएको छ ।

संघका अनुसार यस वर्ष करिब ५१ हजार जनाले अवलोकन गर्ने तथा १ करोड ५० लाखभन्दा बढीको व्यावसायिक कारोबार हुने अनुमान छ ।

हाल नर्सरी क्षेत्रमा ११ अर्ब ८३ करोड रुपैयाँ बराबर लगानी रहेको र वार्षिक ६ अर्ब ४३ करोड रुपैयाँको आर्थिक कारोबार हुने गरेको संघले जानकारी दिएको छ ।