२३ असोज, जनकपुरधाम । हतियारको राजनीति छाडेर शान्तिपूर्ण आन्दोलनमा आएको तराई संयुक्त जनक्रान्ति पार्टी नेपालले सरकारलाई हतियार बुझाउने भएको छ ।
संवैधानिक-राजनीतिक संवाद तथा सहमति समितिअन्तर्गत रहेको प्रारम्भिक वार्ता उपसमितिसित भएको वार्ताअनुसार पार्टीले सरकारसमक्ष हतियार बुझाउने भएको हो ।
जनकपुरमा आयोजित पत्रकार सम्मेलनमा अनुराग समूहका संयोजक भुवनेश्वर मण्डलले देशका विभिन्न कारागारमा रहेका करिब १५ जना बन्दी कार्यकर्तालाई सम्झौताअनुरुप सरकारले रिहा गर्नुपर्ने माग गरे ।
कति हतियार छ भन्नेबारे सञ्चारकर्मीले राखेको जिज्ञासामा पार्टीका पूर्व संयोजक गजेन्द्र मण्डल अनुरागले हतियारको सङ्ख्या खुलाउन चाहेनन् । उनले भएका हतियार यसै महिनाभित्र सरकारसमक्ष हतियार व्यवस्थापन गर्ने प्रतिबद्धता व्यक्त गरे । रासस
