रेसुङ्गामा एक महिने साउने मेला सकियो, सवा लाख बढी श्रद्धालु पुगे

१ भदौ, गुल्मी । गुल्मीको धार्मिक तथा ऐतिहासिक क्षेत्र रेसुङ्गामा सञ्चालन भएको एक महिने साउने मेला सम्पन्न भएको छ । साउन १ गतेदेखि सुरु भएको मेला साउन महिनाभर विभिन्न धार्मिक तथा सांस्कृतिक गतिविधिसहित सञ्चालन गरिएको हो ।

मेलाको अवधिमा रेसुङ्गा पोखरीमा स्नान, पूजा-आराधना तथा धार्मिक स्थलको दर्शन गर्न गुल्मी जिल्लासहित छिमेकी तथा विभिन्न जिल्लाबाट ठूलो संख्यामा श्रद्धालु भक्तजन रेसुङ्गा पुगेका थिए ।

रेसुङ्गा संरक्षण समितिका अध्यक्ष सुरेशचन्द्र भुसालका अनुसार एक महिनाको अवधिमा करिब सवा लाख भन्दा बढी श्रद्धालु भक्तजनले रेसुङ्गाको भ्रमण गरेका छन् ।

गुल्मी, अर्घाखाँची, पाल्पा, बागलुङ, प्युठान, रुपन्देहीलगायत जिल्लाबाट भक्तजन तथा पर्यटक रेसुङ्गा पुगेका हुन् । विशेषगरी साउने औंसी र एकादशीका दिन रेसुङ्गा क्षेत्रमा भक्तजनको उल्लेख्य भीड लागेको हो ।

हिन्दू धर्मावलम्बीबीच धार्मिक आस्थाको महत्वपूर्ण केन्द्रका रूपमा परिचित रेसुङ्गा पोखरीमा स्नान तथा पूजा-आराधना गरेमा अन्जानमा भएका पाप नष्ट हुने धार्मिक विश्वास रहँदै आएको छ । यही धार्मिक विश्वासका कारण हरेक वर्ष साउन महिनामा रेसुङ्गामा श्रद्धालुहरूको चहलपहल बढ्ने गर्दछ ।

टाढाटाढाबाट आएका भक्तजनहरू पोखरीमा स्नान गरी पूजा-आराधना गर्ने, मन्दिर तथा धार्मिक स्थलको दर्शन गर्ने र केही समय रेसुङ्गाको प्राकृतिक वातावरणमा बिताउने गरेका थिए । मेलालाई व्यवस्थित बनाउन समितिले धार्मिक गतिविधिसँगै भक्तजनको आवागमन र व्यवस्थापनमा समेत ध्यान दिएको जनाएको छ ।

साउनको विशेष अवसरमा रेसुङ्गा पोखरी तथा आसपासका धार्मिक स्थलमा बिहानैदेखि भक्तजनको आवागमन हुने गरेको थियो । मेलाका कारण रेसुङ्गाको धार्मिक महत्व थप उजागर हुनुका साथै स्थानीय पर्यटन प्रवर्द्धनमा समेत सकारात्मक योगदान पुगेको समितिको विश्वास छ ।

धार्मिक आस्थाका लागि मात्र नभई प्राकृतिक सौन्दर्य र मनोरम दृश्यावलोकनका लागि पनि रेसुङ्गा पछिल्लो समय आकर्षणको केन्द्र बन्दै गएको छ । समुद्री सतहबाट उच्च क्षेत्रमा अवस्थित रेसुङ्गाबाट गुल्मीका विभिन्न भूभागका साथै आसपासका पहाडी क्षेत्रको मनोरम दृश्य अवलोकन गर्न सकिन्छ ।

रेसुङ्गामा निर्माण गरिएको भ्यूटावरबाट सदरमुकाम तम्घाससहित गुल्मीका विभिन्न क्षेत्र र वरपरका पहाडी भूभागको दृश्य हेर्न सकिने भएकाले आन्तरिक पर्यटकको आकर्षणसमेत बढ्दै गएको छ । विशेषगरी सार्वजनिक बिदा तथा शनिबारका दिन रेसुङ्गामा घुम्न आउने आन्तरिक पर्यटकको संख्या बढ्ने गरेको स्थानीयहरू बताउँछन् ।

धार्मिक स्थलको दर्शनसँगै प्राकृतिक वातावरणको आनन्द लिन चाहनेहरूका लागि रेसुङ्गा उपयुक्त गन्तव्य बन्दै गएको छ । साउन महिनामा धार्मिक पर्यटकको चाप बढे पनि अन्य समयमा समेत रेसुङ्गामा घुम्न आउनेको संख्या विस्तारै बढिरहेको छ ।

गुल्मी सदरमुकाम तम्घासबाट करिब २० मिनेटको सवारी यात्रामा पुग्न सकिने भएकाले रेसुङ्गाको पहुँच पनि सहज छ । साउने मेला सम्पन्न भए पनि रेसुङ्गामा धार्मिक तथा पर्यटकीय गतिविधि भने वर्षभरि नै सञ्चालन हुने गर्दछ ।