झुर भनेर मजाक उडाइएको फिल्मले बक्स अफिसमा ल्यायो आँधी

चिनियाँ एनिमेटेड फिल्म ‘निउ लाइ’ अप्रत्याशित रूपमा बक्स अफिस र इन्टरनेटमा सनसनी बनेको छ । निर्माणको गुणस्तरलाई लिएर सुरुमा अनलाइनमा ‘सबैभन्दा खराब’ भन्दै मजाक उडाइएको यो फिल्म अहिले चीनसँगै विदेशमा समेत चर्चित बनेको छ । यससँग सम्बन्धित मिम र मर्चेन्डाइज फैलिएका छन् भने विश्वभरका दर्शकको चासो पनि बढिरहेको छ ।

टिकेटिङ तथा बक्स अफिस प्लेटफर्म लाइटहाउसका अनुसार आइतबारसम्म फिल्मले बक्स अफिसमा ४ करोड ५० लाख युआन अर्थात ६७ लाख अमेरिकी डलरभन्दा बढी कमाएको छ । यसैबीच क्रिस्टोफर नोलनको ‘द ओडिसी’ चीनमा यस गर्मीयाममा सर्वाधिक कमाइ गर्ने फिल्मको सूचीमा हाल छैटौं स्थानमा छ । सो फिल्मले ४६ करोड ७० लाख युआन कमाएको छ ।

‘निउ लाइ’ अगस्ट ५ मा चिनियाँ हलमा प्रदर्शनमा आएको थियो । पहिलो दिन फिल्मले जम्मा ३४२ युआन कमाएको थियो ।

प्रदर्शनको पहिलो १० दिनमा यसको कुल कमाइ करिब ७ हजार ७०० युआन मात्रै थियो । तर अगस्ट १४ देखि शो र टिकट बिक्री तीव्र रूपमा बढ्न थाल्यो । यसको कमजोर मानिएको एनिमेसनलाई लिएर अनलाइनमा व्यापक उपहास र फिल्मप्रतिको उत्सुकताले टिकट बिक्री बढाउन भूमिका खेलेको थियो ।

अनलाइनमा फिल्मलाई ‘हलमा प्रदर्शन भएको सबैभन्दा आधारभूत फिल्म’, झूर स्तरको र ‘एआईबाट बनाइएको एनिमेसनभन्दा पनि खराब’ जस्ता टिप्पणी गरिएको थियो । केही नेटिजनले ‘सन् २०२६ मा प्रदर्शन भएको चिनियाँ एनिमेटेड फिल्म हो भनेर विश्वास गर्नै गाह्रो भएको’ बताएका थिए । अरूले भने ‘यो आखिर कति खराब रहेछ’ भनेर थाहा पाउनकै लागि फिल्म हेर्न चाहेको बताएका थिए ।

शीर्षकले पनि शब्द खेल्ने अवसर दियो । चिनियाँ भाषामा ‘निउ लाइ’को शाब्दिक अर्थ ‘साँढे आउँदैछ’ हुन सक्छ । यसलाई लिएर केही नेटिजनले अब अन्ततः ‘बुल मार्केट’ आउन लागेको भन्दै मजाक गरे । केहीले त चाँडै ‘बुल मार्केट’ आओस् भन्ने चाहना राख्ने सेयर बजारका लगानीकर्ता हलतिर जान थालेको टिप्पणीसमेत गरे ।

आमा र छोराको टोलीले पाँच वर्षभन्दा बढी समय लगाएर यो फिल्म बनाएका हुन् । यसको अपरिष्कृत एनिमेसन, पात्रहरूको अस्वाभाविक र कडा चाल तथा अनौठो कथावस्तु नै अहिले लोकप्रियताको प्रमुख कारण बनेका छन् ।

यसपछि ‘निउ लाइ’ चीनमा व्यापक अनलाइन प्रवृत्तिका रूपमा फैलिएको छ । व्यापारीले पात्रमा आधारित प्लस खेलौना बिक्री गर्न थालेका छन् । प्रशंसकले मिम, पोस्टर तथा अन्य अनौपचारिक मर्चेन्डाइज बनाएका छन् ।

फिल्म निर्माण कम्पनीले अहिलेसम्म आधिकारिक पोस्टर सार्वजनिक नगरे पनि दर्शकले आफैं बनाएका पोस्टर हलमा समेत राखेका छन् ।

चीनको टिकटक संस्करण दोउयिनमा प्रयोगकर्ताले फिल्ममा आधारित ठूलो संख्यामा क्लिप तथा अन्य सामग्री बनाएका छन् । प्लेटफर्ममा रहेका विभिन्न आधिकारिक चिनियाँ अकाउन्ट पनि यो ट्रेन्डमा सहभागी छन् । केही प्रयोगकर्ताले एआई उपकरण प्रयोग गरेर मिमका नयाँ संस्करणसमेत बनाएका छन् ।

पूर्वी चीनको आन्हुई प्रान्तको राजधानी हेफेईस्थित प्रहरीले आफ्नो दोउयिन अकाउन्टमा पोस्ट गरेको ट्राफिक सुरक्षा सूचनामा समेत फिल्मको एउटा तस्बिर प्रयोग गरेको छ ।

हङकङमा पनि फिल्मप्रति चासो बढेको छ । सामाजिक सञ्जाल प्रयोगकर्ताले यसको अप्रत्याशित बक्स अफिस सफलताबारे छलफल गर्दै स्थानीय हलमा प्रदर्शन गर्न माग गरिरहेका छन् ।

केही प्रयोगकर्ताले हङकङको ब्रोडवे सिनेमाथेकलाई ट्याग गर्दै फिल्म कहिले प्रदर्शन गर्ने भनेर सोधेका थिए । सिनेमाको आधिकारिक अकाउन्टले ‘कुराकानी भइरहेको’ जवाफ दिएपछि हङकङका फिल्मप्रेमी उत्साहित भएका थिए ।

पछि सिनेमाले दर्शकबाट प्रदर्शनका लागि थुप्रै अनुरोध आएको तर प्रदर्शन योजना अझै टुंगो नलागेको जनाएको स्थानीय सञ्चारमाध्यमले उल्लेख गरेका छन् ।

यो फिल्मको चर्चा चीनको सीमाबाहिर पनि फैलिएको छ । फाइनान्सियल टाइम्सलगायत अन्तर्राष्ट्रिय सञ्चारमाध्यमले फिल्मबारे समाचार प्रकाशित गरेका छन् । केहीले यसको अप्रत्याशित उदयलाई ‘द रुम’ जस्ता कलट फिल्मसँग तुलना गरेका छन्, जुन फिल्म आफ्ना कमजोरीलाई दर्शकले अपनाएकै कारण चर्चित बनेको थियो ।

फिल्मको बढ्दो लोकप्रियता सामाजिक सञ्जालमा मात्रै सीमित छैन ।

सान फ्रान्सिस्कोमा स्वतन्त्र रूपमा आयोजना गरिएका ‘निउ लाइ’का दुईवटा प्रदर्शनका सबै टिकट बिक्री भएको सान फ्रान्सिस्को क्रोनिकलले जनाएको छ । ती शो आयोजना हुँदा फिल्मले विदेशमा व्यापक आधिकारिक प्रदर्शनको व्यवस्था गरिसकेको थिएन ।

अहिले विदेशी वितरकले समेत फिल्ममा चासो देखाउन थालेका छन् । सिंगापुरको लियान्हे जाओबाओका अनुसार सिंगापुरका वितरकले ‘निउ लाइ’ लाई स्थानीय हलमा ल्याउनेबारे विचार गरिरहेका छन् ।

‘निउ लाइ’ सँग सम्बन्धित मिमलाई चीनबाहिरका संस्थाले समेत प्रयोग गर्न थालेका छन् । यसले फिल्मको दृश्य सामग्री स्वयं फिल्मभन्दा बाहिर पनि फैलिन थालेको देखाएको छ ।

लियान्हे जाओबाओका अनुसार मलेसियाको जोहोर बाहरुस्थित एक रक्तदान केन्द्रले मानिसलाई रक्तदानका लागि प्रोत्साहित गर्न हास्यपूर्ण र प्रेरणादायी सामाजिक सञ्जाल सन्देशमा ‘निउ लाइ’को कथा प्रयोग गरेको थियो ।

नेदरल्यान्ड्सको रेल सञ्चालक नेदरल्यान्ड्से स्पुरवेगेनको आधिकारिक टिकटक अकाउन्टले पनि आफ्नो एउटा पोस्टमा ‘निउ लाइ’ मिम प्रयोग गर्दै यो ट्रेन्डमा सहभागिता जनाएको छ ।

नान्जिङ नर्मल युनिभर्सिटीका सांस्कृतिक अनुसन्धानकर्ता तथा एसोसिएट प्रोफेसर झाङ पेङका अनुसार यस्ता प्रयोगले ‘निउ लाइ’ फिल्मसँग सम्बन्धित मिममा मात्रै सीमित नरही व्यापक इन्टरनेट संस्कृतिको हिस्सा बन्दै गएको संकेत गर्छ । संस्था र ब्रान्डले दर्शकसँग जोडिन यसको पहिचानयोग्य दृश्य सामग्री प्रयोग गर्न थालेको उनले ग्लोबल टाइम्सलाई बताए ।

झाङका अनुसार विदेशमा देखिएको प्रतिक्रिया अन्तर्राष्ट्रिय दर्शक खोज्ने चिनियाँ फिल्मले परम्परागत रूपमा अपनाउँदै आएको बाटोको ठीक उल्टो छ । चिनियाँ संस्कृति वा महँगा भिजुअल इफेक्टमा आधारित परिष्कृत निर्माणका रूपमा विदेशमा प्रचार हुनुको साटो ‘निउ लाइ’ मुख्यतः यसको अपरिष्कृत शैली र असंगतिलाई दर्शकले बेवास्ता गर्न नसकेका कारण विदेशसम्म पुगेको उनले बताए।

उनले फिल्मको अप्रत्याशित विदेशी लोकप्रियतालाई सांस्कृतिक निर्यातको असामान्य रूपका रूपमा व्याख्या गरेका छन् । यो परम्परागत फिल्म मार्केटिङबाट मात्रै नभई मिम, उत्सुकता र यो घटनालाई आफैं अनुभव गर्ने दर्शकको चाहनाबाट समेत अघि बढिरहेको उनको भनाइ छ ।

झाङले भने, ‘विश्वव्यापी अनलाइन संस्कृतिबीचको बलियो अन्तरसम्बन्धका कारण यस्तो ‘मिसन इम्पोसिबल’ एनिमेसन विश्वव्यापी सनसनी र वास्तविकता बन्न सक्छ ।’

ग्लोबल टाइम्सबाट ।