के-पप स्टार ली नोद्वारा नेपालका बाढीपीडितलाई ७२ हजार अमेरिकी डलर सहयोग

के-पप ब्वाय ब्यान्ड ‘स्ट्रे किड्स’का सदस्य ली नोले नेपालमा भीषण बाढीबाट विस्थापित मानिसको राहतका लागि १० करोड वन (करिब ७२ हजार अमेरिकी डलर) सहयोग गरेका छन् । उनको व्यवस्थापन एजेन्सी जेवाईपी इन्टरटेनमेन्टले सोमबार उक्त जानकारी दिएको हो ।

जेवाईपी इन्टरटेनमेन्टका अनुसार ली नोले अगस्ट २८ मा अन्तर्राष्ट्रिय मानवीय तथा विकास संस्था वर्ल्ड भिजनलाई उक्त रकम प्रदान गरेका थिए । उनले बाढीबाट प्रभावित बालबालिका र परिवारको जीवन रक्षा तथा उनीहरूको जीविकोपार्जनमा सहयोग पुर्‍याउन रकम प्रयोग गर्न आग्रह गरेका छन् ।

उक्त सहयोग रकम बाढी प्रभावित बासिन्दाका लागि खाद्य तथा पोषण सहायता, अस्थायी आवास, स्वच्छ पानी तथा सरसफाइसम्बन्धी कार्यक्रममा प्रयोग गरिनेछ । जेवाईपी इन्टरटेनमेन्टमार्फत जारी वक्तव्यमा ली नोले भनेका छन्, ‘मेरो यो सानो प्रयासले कठिन समयबाट गुज्रिरहेका मानिसहरूलाई थोरै भए पनि बल प्रदान गर्न सकोस् भन्ने आशा गर्छु ।’

उनले थप भने, ‘विस्थापित भएका मानिस र राहत कार्यमा खटिएका सबै जना सकेसम्म चाँडो शान्तिपूर्ण दैनिक जीवनमा फर्कन सकून् भन्ने मेरो हार्दिक कामना छ ।’

ली नोले स्वदेश तथा विदेशका विभिन्न सामाजिक कार्यमा नियमित रूपमा सहयोग गर्दै आएका छन् । उनले सन् २०१४ देखि वर्ल्ड भिजनमार्फत विदेशका बालबालिकालाई प्रायोजन गर्न थालेका थिए ।

सन् २०२४ मा उनले विश्वका सबैभन्दा गरिब मुलुकका बालबालिकाका लागि क्रिश्चियन संस्थाको विश्वव्यापी खाद्य संकट प्रतिकार्य कार्यक्रममा १० करोड वन सहयोग गरेका थिए । त्यसपछि उनी वर्ल्ड भिजनका संस्थापकको नाममा स्थापित ‘बब पियर्स अनर क्लब’का सबैभन्दा कम उमेरका सदस्य बनेका थिए । उक्त क्लबमा कुल कम्तीमा १० करोड वन सहयोग गर्ने दातालाई समावेश गरिन्छ।

सन् २०२५ मा उनले सामसङ सोल अस्पताल र बिरालो उद्धार संस्था नाबिया साराङ्हेलाई गरी कुल २० करोड वन सहयोग गरेका थिए । अस्पताललाई दिइएको रकम गम्भीर रोगबाट पीडित वयस्क बिरामी तथा बाल बिरामीको उपचार र हेरचाह खर्चका लागि प्रदान गरिएको थियो।

स्ट्रे किड्सको पछिल्लो ईपी ‘दिस एन्ड द्याट’ अगस्ट ७ मा सार्वजनिक भएको थियो । उक्त ईपी बिलबोर्ड २०० को शीर्ष स्थानमा प्रवेश गरेको थियो । योसँगै समूहले लगातार नवौं पटक उक्त चार्टको शीर्ष स्थानमा पुग्ने एल्बमको उपलब्धि हासिल गरेको छ ।

समूह हाल ‘दिस एन्ड द्याट’ को प्रवर्धनका लागि भ्रमणमा छ ।