सर्वदलीय बैठक : राहत, उद्धार र पुनर्स्थापनामा सरकारसँग समन्वय गरिने

१६ भदौ, काठमाडौं । सर्वदलीय बैठकले राहत, उद्धार र पुनर्स्थापनामा सरकारसँग समन्वय गरेर अघि बढ्ने सहमति गरेको छ ।

रास्वपाको आह्वानमा मंगलबार सिंहदरबारमा बसेको सर्वदलीय बैठकले विपद्को अवस्थामा एकजुट भएर राहत, उद्धार र पुनर्स्थापनामा सरकारसँग समन्वय गरेर अघि बढ्ने सहमति गरेको हो ।

बैठकपछि रास्वपा प्रवक्ता जगदिश खरेलले खोजी, उद्धार र राहतका विषयमा विभिन्न राजनीतिक दलहरूबाट प्राप्त सल्लाह, सुझाव तथा प्रतिक्रियाहरूलाई गम्भीर रूपमा लिइएको बताए ।

उनले केन्द्रमा बनेको राजनीतिक सञ्जाललाई सवै तहमा विस्तार गर्ने सहमति भएको उल्लेख गरे ।

यस्तै प्रकारका सर्वदलीय बैठक तथा संयन्त्रहरू बागमती प्रदेश, बाढी प्रभावित सबै जिल्ला तथा स्थानीय पालिकाहरूमा पनि गठन गरिने उनको भनाइ छ ।

संयन्त्रहरूको मुख्य उद्देश्य तिनै तहका सरकारहरूले गरिरहेका विपद् व्यवस्थापनसम्बन्धी काममा सहयोग र सहजीकरण गर्नु हुने उल्लेख पनि उनले गरे ।

सिङ्गो बस्ती सार्न तीनै तहका सरकार, नागरिक, प्रभावित समुदाय र राजनीतिक दलहरूबीच राष्ट्रिय सहमति आवश्यक पर्ने भएकाले उच्चस्तरीय राजनीतिक संयन्त्रलाई निरन्तरता दिँदै अघि बढ्ने सहमति भएको समेत प्रवक्ता खरेलले बताए ।

बैठकपछि एमाले नेता प्रदीप ज्ञवालीले प्रभावित क्षेत्रका पीडित नागरिकहरूलाई राहत वितरण गर्ने कुरामा सरकार गम्भीर हुनुपर्ने, सुरुङमा फसेका व्यक्तिहरूको उद्धारका लागि अन्तराष्ट्रिय सहयोग लिनुपर्ने सुझाव दिएको बताए ।

त्यस्तै नेकपा नेता वर्षमान पुनले सुरुङमा थुनिएका मजदुरको उद्दारका लागि बिज्ञहरु परिचालन गर्नुपर्ने बताए । निजी क्षेत्र र अन्य विदेशी कम्पनीहरुलाई समेत उद्धारमा खुला गर्नुपर्ने उनको भनाइ छ ।

कांग्रेसका प्रवक्ता देवराज चालिसेले सुरुङमा थुनिएका व्यक्तिहरूलाई खोजी र उद्धार कार्यमा सरकारले अन्य देशसंग प्राविधिक सहयोग लिनुपर्ने बताए ।