खप्तडछेडेदहकी कमलाले बाटैमा जन्माइन् बच्चा

News Summary

Generated by OK AI. Editorially reviewed.

बाजुराको खप्तडछेडेदह गाउँपालिका–४ की २६ वर्षीया कमला बोगटीले मंगलबार बुढीगंगा नगरपालिका–६ मा बाटोमै बच्चा जन्माएकी छिन्।
सुत्केरी व्यथा लागेकी कमलालाई स्थानीयको खबरपछि स्वास्थ्यकर्मीको टोलीले घटनास्थलमै प्रसूति सेवा दिँदै सालनाल व्यवस्थापन गरेको हो।
स्वास्थ्यकर्मीका अनुसार आमा र बच्चा दुवैलाई बाजुरा स्वास्थ्य चौकी लगिएको छ र दुवैको अवस्था सामान्य छ।

२४ भदौ, बाजुरा । बाजुराको खप्तडछेडेदह गाउँपालिका–४ की २६ वर्षीया कमला बोगटीले बाटोमै बच्चा जन्माएकी छिन् ।

मंगलबार दिउँसो बुढीगंगा नगरपालिका–६, फालासैन बजारमाथिको बाटोमा सुत्केरी व्यथा लागेर छट्पटाइरहेकी कमलालाई स्वास्थ्यकर्मीको टोलीले बाटोमै प्रसूति सेवा दिएको हो ।

बाजुरा स्वास्थ्य चौकीमा कार्यरत सिनियर अनमी ईश्वरी केसीका अनुसार कमलालाई सुत्केरी व्यथा लागेर बाटोमा अलपत्र परेको देखेपछि स्थानीयले स्वास्थ्यकर्मीलाई खबर गरेका थिए । त्यसपछि बाजुरा स्वास्थ्य चौकी टाँटाका स्वास्थ्यकर्मी हस्त खडायत र ईश्वरी केसी तथा जिल्ला अस्पताल बाजुराकी नर्स निशा रोकायासहितको टोली घटनास्थल पुगेको थियो ।

नर्स रोकायाका अनुसार आफू पुग्दा कमला प्रसव पीडाले छट्पटाइरहेकी थिइन् । नर्सको सहयोगमा केही समयमै उनले बच्चा जन्माइन् ।

स्वास्थ्यकर्मीले बाटोमै सालनाल व्यवस्थापन गरी आमा र बच्चालाई बाजुरा स्वास्थ्य चौकीमा लगेका थिए । हाल आमा र बच्चा दुवैको अवस्था सामान्य रहेको सिनियर अनमी ईश्वरी केसीले बताइन् ।

कमला १९ भदौ कृष्ण जन्माष्टमीका दिन खप्तडछेडेदहबाट माइतीघर बडिमालिका नगरपालिका–६, कोर्ध गाउँ पुगेकी थिइन् । २२ भदौ राति माइतीघरमै उनलाई सुत्केरी व्यथा लाग्यो ।

विवाहित महिलाले माइतीघरमा बच्चा जन्मए देवता रिसाउँछन् भन्ने अन्धविश्वासका कारण कमला स्वास्थ्य संस्था जानुको सट्टा आफ्नो घरतर्फ हिँडेकी थिइन् । माइतीबाट घरतर्फ आउँदै गर्दा उनले बाटोमै बच्चा जन्माएकी हुन् ।

स्वास्थ्यकर्मीका अनुसार कोर्ध गाउँबाट करिब एक घण्टाको दूरीमा जडाङ्गा स्वास्थ्य चौकी र दुई घण्टाको दूरीमा जिल्ला अस्पताल बाजुरा रहेको छ । तर अस्पताल जानुको सट्टा घरतर्फ हिँडेकी कमलाले करिब ७ घण्टापछि दिउँसो ३ बजे बुढीगंगा नगरपालिका क्षेत्रमा बाटोमै बच्चा जन्माएकी हुन् ।