साडी वा लेहेंगामा हेयरस्टाइल कस्तो बनाउने ? सजिलो ५ तरिका

चाडपर्व, विवाह, पूजा, पारिवारिक जमघट वा कुनै विशेष अवसरमा साडी, कुर्ता, अनारकली वा लेहेंगा लगाउँदा कस्तो हेयरस्टाइल बनाउने ?

जब कुनै विशेष पारिवारिक विशेष जमघट हुन्छ, अधिकांश महिलामा यो चिन्ता हुने गर्छ ।

राम्रो हेयरस्टाइलले पहिरनको सुन्दरता बढाउनुका साथै अनुहारको बनावटलाई समेत आकर्षक देखाउन सक्छ । हेयरस्टाइल बनाउन हरेकपटक पार्लर धाउनुपर्छ भन्ने छैन । घरमै केही मिनेटमा बनाउन सकिने सजिला हेयरस्टाइलले पनि एथनिक पहिरनलाई आकर्षक र व्यवस्थित देखाउन सक्छन् । त्यसमाथि गजरा, फूल, मोतीका हेयरपिन वा अन्य सामान्य सामग्री थप्दा साधारण हेयरस्टाइल पनि विशेष देखिन्छ ।

अहिले धेरै सजावटभन्दा सरल, प्राकृतिक र सहज हेयरस्टाइलको चलन पनि बढिरहेको छ । लामो समयसम्म टिक्ने र विभिन्न किसिमका एथनिक पहिरनसँग सजिलै मिल्ने यस्ता हेयरस्टाइल चाडपर्वका लागि उपयोगी हुन सक्छन् ।

क्लासिक लो बन

साडी, सिल्कको कुर्ता वा लेहेंगासँग लो बन निकै सुहाउँदो देखिन्छ । कपाललाई बीच वा साइडबाट छुट्याएर तलतिर सफासँग बाँधेर बन बनाउन सकिन्छ । बनलाई अझ आकर्षक देखाउन गजरा, ताजा फूल वा मोतीका हेयरपिन प्रयोग गर्न सकिन्छ । यो हेयरस्टाइलले अनुहारलाई सफा र स्टाइलिश देखाउँछ । विशेषगरी परम्परागत पहिरनसँग यसले आकर्षक र शाही शैलीको झल्को दिन्छ ।

साइड ब्रेड

परम्परागत पहिरनमा केही फरक शैली थप्न चाहनुहुन्छ भने साइड ब्रेड अर्थात् छेउतिरको चोटी राम्रो विकल्प हुन सक्छ । कपाललाई एकातिर लगेर हल्का खुकुलो चुल्ठोमा बनाउन सकिन्छ ।

चुल्ठोमा साना फूल, रिबन वा आकर्षक पिन लगाउँदा हेयरस्टाइल अझ सुन्दर देखिन्छ । लामो कपालमा यो शैली विशेष खुल्छ । कुर्ता, अनारकली र लेहेंगासँग पनि सजिलै मिलाउन सकिन्छ ।

हाफ–अप हाफ–डाउन

खुला कपाल मन पराउनेहरूका लागि हाफ–अप हाफ–डाउन अर्थात् केही कपाल बाँधेर बाँकी खुला राख्ने शैली उपयुक्त हुन्छ । अगाडिको केही कपाललाई पछाडि लगेर पिनले बाँध्ने र बाँकी कपाल खुला छोड्ने गरिन्छ । कपालमा हल्का घुमाउरोपन थप्दा यो हेयरस्टाइल अझ आकर्षक देखिन्छ । लगभग सबै प्रकारका अनुहार र एथनिक पहिरनमा सुहाउने भएकाले चाडपर्वका लागि यो सजिलो विकल्प बन्न सक्छ।

हल्का वेभसहित खुला कपाल

धेरै समय लगाएर कपाल बनाउन नचाहनेहरूका लागि हल्का वेभ बनाएर कपाल खुला छोड्न सकिन्छ । कपाललाई बीच वा साइडबाट छुट्याएर हल्का घुमाउरो बनाउने र त्यसमा सुन्दर हेयरक्लिप, फूल वा मागटीका थप्न सकिन्छ । जर्जेट, सिफन तथा फूलबुट्टे एथनिक पहिरनसँग यस्तो हेयरस्टाइल विशेष आकर्षक देखिन्छ । सरल र प्राकृतिक देखिन चाहनेहरूका लागि यो राम्रो विकल्प हुन सक्छ ।

ट्विस्टेड लो पोनीटेल

साधारण पोनीटेललाई पनि केही फरक तरिकाले बनाएर आकर्षक बनाउन सकिन्छ । कपालको दुवैतर्फबाट केही भाग छुट्याएर हल्का ट्विस्ट गर्दै पछाडि लगेर तलतिर पोनीटेल बनाउन सकिन्छ ।त्यसपछि मोतीको हेयरपिन, धातुको क्लिप वा अन्य सामान्य सामग्री थप्न सकिन्छ । सरल तर स्टाइलिस देखिन चाहनेहरूका लागि यो हेयरस्टाइल उपयुक्त हुन्छ । पूजा, पारिवारिक जमघटदेखि चाडपर्वको कार्यालय समारोहसम्ममा पनि यसलाई सजिलै अपनाउन सकिन्छ ।

हेयरस्टाइललाई अझ आकर्षक बनाउन यी कुरा ध्यान दिनुहोस्

हेयरस्टाइल बनाउनुअघि कपाल राम्ररी सुल्झाउनुहोस् । कपाल धेरै रुखो वा अस्तव्यस्त देखिएको छ भने थोरै हेयर सिरम लगाएर मुलायम बनाउन सकिन्छ । लामो समयसम्म हेयरस्टाइल टिकाउन हल्का होल्ड भएको हेयर स्प्रे प्रयोग गर्न सकिन्छ ।

ताजा फूल, मोतीका पिन वा सामान्य हेयर एक्सेसरिजले पनि एथनिक लुकलाई थप आकर्षक बनाउन सक्छन् । तर धेरै सामग्री प्रयोग गर्नुभन्दा आफ्नो पहिरन, अनुहारको बनावट र अवसरअनुसार हेयरस्टाइल तथा सजावट छनोट गर्नु राम्रो हुन्छ ।