नयाँ आप्रवासन नीतिविरुद्ध अस्ट्रेलियामा विद्यार्थी प्रदर्शन

२ असोज, क्यानबेरा । अस्ट्रेलियाको राजधानी क्यानबेरामा बिहीबार विद्यार्थीहरूले पाउलिन ह्यान्सन नेतृत्वको वन नेसन पार्टीविरुद्ध प्रदर्शन गरेका छन्।

गारेमा प्लेसमा दिउँसो १ बजेदेखि ३ बजेसम्म स्टुडेन्ट्स से नो टु ह्यान्सन नाममा प्रदर्शन आयोजना गरिएको थियो। यसको आयोजना हाई स्कुल एन्टी–क्यापिटलिस्ट्सले गरेको थियो।

सेप्टेम्बर १७ मा आयोजना गरिएको यो प्रदर्शन अगस्ट १३ मा भएको विद्यार्थी आन्दोलनको दोस्रो चरण हो। अगस्टमा सिड्नी, मेलबर्न र ब्रिसबेनसहितका सहरमा उच्च माध्यमिक तथा विश्वविद्यालयका विद्यार्थी कक्षा छाडेर वन नेसन र ह्यान्सनको राजनीतिविरुद्ध सडकमा आएका थिए। त्यस प्रदर्शनमा प्रत्येक प्रमुख सहरमा सयौँ विद्यार्थी सहभागी भएको एबीसीले जनाएको थियो।

यसपटक पनि सिड्नी, मेलबर्न, ब्रिसबेन, एडिलेड, डार्विन र होबार्टलगायतका सहरमा विद्यार्थी प्रदर्शन भएका छन्। एएपीको रिपोर्टअनुसार सिड्नीमा एक हजारभन्दा बढी मानिस सहभागी भएको प्रदर्शनमा विद्यार्थीहरूले ह्यान्सनको आप्रवासनसम्बन्धी प्रस्तावको विरोध गरेका थिए।

मेलबर्नमा पनि सयौँ विद्यार्थी सहभागी भएका थिए।

आप्रवासन नीति मुख्य मुद्दा

सेप्टेम्बर १४ मा वन नेसनले आगामी तीन वर्षमा अस्ट्रेलियामा रहेका अस्थायी भिसाको संख्या ७ लाख ५० हजारभन्दा बढीले घटाउने नेट–नेगेटिभ माइग्रेसन योजना सार्वजनिक गरेको छ। पार्टीले यो योजनालाई आफ्नो आप्रवासन नीतिको प्रमुख आधारका रूपमा प्रस्तुत गरेको छ।

यसैबीच सार्वजनिक विवरणअनुसार वन नेसनले वार्षिक विद्यार्थी भिसाको संख्या करिब २ लाख ९१ हजारबाट घटाएर १ लाख १५ हजारमा सीमित गर्ने र ग्राजुएट भिसाको संख्या पनि घटाउने प्रस्ताव गरेको छ।

विद्यार्थीका परिवारका सदस्यलाई दिइने माध्यमिक भिसामा पनि कटौती गर्ने योजना पार्टीले अघि सारेको छ।

यही प्रस्तावले विश्वविद्यालय तथा अन्तर्राष्ट्रिय विद्यार्थी समुदायमा थप बहस सिर्जना गरेको छ। बिहीबारको प्रदर्शनमा सहभागी विद्यार्थीहरूले आप्रवासन, बहुसांस्कृतिकता र सामाजिक अधिकारसँग सम्बन्धित वन नेसनका नीतिप्रति असहमति व्यक्त गरेका थिए।

अगस्टको प्रदर्शनपछि फेरि सडकमा

अगस्ट १३ को पहिलो राष्ट्रव्यापी विद्यार्थी प्रदर्शन राष्ट्रिय विद्यार्थी युनियनसहित विद्यार्थी समूहहरूको आह्वानमा भएको थियो। त्यस क्रममा सिड्नी, मेलबर्न र ब्रिसबेनमा विद्यार्थीहरूले कक्षा बहिष्कार गरेका थिए।

कतिपय स्थानमा वन नेसन समर्थक र प्रदर्शनकारीबीच तनावको अवस्था बनेपछि प्रहरीले हस्तक्षेपसमेत गरेको एबीसीले जनाएको थियो।

अगस्टको प्रदर्शनपछि सेप्टेम्बर १७ मा दोस्रो चरणको आन्दोलन गर्ने घोषणा गरिएको थियो। क्यानबेरामा यसका लागि गारेमा प्लेसलाई प्रदर्शनस्थल तोकिएको थियो।

वन नेसनको पछिल्लो राजनीतिक प्रभाव पनि यी प्रदर्शनको पृष्ठभूमिमा जोडिएको छ। रोय मोर्गनको सेप्टेम्बर ७–१३ को सर्वेक्षणमा वन नेसनको प्राथमिक मत समर्थन २५ प्रतिशत देखिएको थियो।

उक्त सर्वेक्षण अस्ट्रेलियाभरका १,५८३ मतदातामा गरिएको थियो।

वन नेसन र ह्यान्सनले भने विद्यार्थी प्रदर्शन तथा उनीहरूमाथि उठाइएका आलोचनाबारे आफ्नो राजनीतिक धारणा राख्दै आएका छन्। अगस्टको प्रदर्शनपछि ह्यान्सनले विद्यार्थीलाई आफू र आफ्नो पार्टीले उनीहरूकै भविष्यका लागि काम गरिरहेको दाबी गरेकी थिइन्।