जर्मनीमा चान्सलर मर्जको पार्टीलाई धक्का, बर्लिनमा वामपन्थी दल अगाडि

५ असोज, काठमाडौं । जर्मनीका चान्सलर फ्रेडरिक मर्ज नेतृत्वको क्रिस्चियन डेमोक्रेटिक युनियन (सीडीयू) लाई दुई राज्यको निर्वाचनमा ठूलो धक्का लागेको छ ।

आइतबार भएको निर्वाचनको एक्जिट पोलअनुसार पूर्वी जर्मनीको मेक्लेनबर्ग–फोरपोमर्न राज्यमा दक्षिणपन्थी अल्टरनेटिभ फर जर्मनी (एएफडी) सबैभन्दा ठूलो दल बन्ने देखिएको छ । त्यहाँ एएफडीले ३८ प्रतिशत मत पाउने अनुमान गरिएको सीएनएनले जनाएको छ ।

एक्जिट पोलअनुसार सीडीयू भने ५ प्रतिशतको थ्रेसहोल्डभन्दा पनि तल देखिएको छ । जर्मनीमा राज्य संसदमा प्रतिनिधित्वका लागि सामान्यत: ५ प्रतिशत मत आवश्यक पर्छ ।

निर्वाचन परिणामको प्रारम्भिक अनुमान सार्वजनिक भएपछि चान्सलर मर्जले उक्त परिणामलाई ‘विपत्ति’ भनेका छन् । ‘हामी मेक्लेनबर्ग–फोरपोमर्नको परिणामलाई राम्रो देखाउने प्रयास गर्न सक्दैनौँ । यो विपत्ति हो,’ उनले भने ।

सीडीयूले कडा मेहनत गरे पनि सोसल डेमोक्रेटिक पार्टी (एसपीडी) र एएफडीबीचको ध्रुवीकरणमा आफ्नो पार्टी नराम्ररी पिसिएको मर्जको भनाइ थियो ।

यद्यपि मर्जले आफ्नो नेतृत्वप्रति देखिएको दबाबबीच पनि सुधारको आवश्यकता औँल्याएका छन् । जर्मनीको आर्थिक समस्या र बढ्दो राजनीतिक विभाजनको समाधान विगतको ‘राम्रो पुरानो दिन’तर्फ फर्किनु नभएको उनले बताएका छन् ।

बर्लिनमा वामपन्थी पार्टी अगाडि

आइतबारै भएको अर्को राज्य निर्वाचनमा राजधानी बर्लिनमा वामपन्थी डाइ लिंके सबैभन्दा अगाडि देखिएको छ ।

एक्जिट पोलअनुसार डाइ लिंकेले २६ प्रतिशत मत पाउने अनुमान गरिएको छ । सीडीयू र ग्रिन्स त्यसपछि रहेका छन् ।

डाइ लिंकेकी प्रमुख उम्मेदवार एलिफ एराल्पले समर्थकहरूलाई सम्बोधन गर्दै निर्वाचन परिणामलाई ‘प्रेम र न्यायले घृणामाथि जित हासिल गरेको’ संकेतका रूपमा व्याख्या गरिन् ।

यता बर्लिनमा एएफडी करिब १३.५ प्रतिशत मतसहित चौथो स्थानमा रहने अनुमान गरिएको छ । सन् २०२३ को राज्य संसद निर्वाचनमा एएफडीले ९.१ प्रतिशत मत पाएको थियो ।

एएफडीको लगातार बलियो प्रदर्शन

मेक्लेनबर्ग–फोरपोमर्नको परिणाम एएफडीका लागि लगातार दोस्रो ठूलो सफलता बन्ने देखिएको छ । दुई साताअघि साक्सोनी–आनहाल्ट राज्यमा भएको निर्वाचनमा एएफडीले ४४ प्रतिशत मतसहित ऐतिहासिक जित निकालेको थियो ।

त्यसपछि जर्मनीको राजनीतिक वृत्तमा चान्सलर मर्जको नेतृत्व र सीडीयूको भविष्यबारे बहस तीव्र बनेको छ ।

एएफडीकी सह–अध्यक्ष एलिस वाइडेलले पछिल्लो परिणामप्रति उत्साह व्यक्त गर्दै आफ्नो पार्टी ‘जर्मनीको नयाँ जनताको पार्टी’ बनेको दाबी गरेकी छन् ।

‘हामीले सीडीयूलाई उछिनेका छौँ र जनताले नीतिमा परिवर्तन चाहेका छन्,’ उनले सीएनएनसँग भनेकी छन् ।

वाइडेलले मर्जको नेतृत्वमाथि समेत प्रश्न उठाउँदै सीडीयूले उनको नेतृत्वमा निरन्तरता दिन नसक्ने दाबी गरिन् ।

आप्रवासन र युक्रेन युद्ध मुख्य मुद्दा

मेक्लेनबर्ग–फोरपोमर्नमा एएफडीले अवैध आप्रवासीको सामूहिक निष्कासन, युक्रेनलाई दिइँदै आएको सैन्य सहयोग अन्त्य तथा रुससँग नजिकको सम्बन्धको पक्षमा अभियान चलाएको थियो ।

यस राज्यमा आप्रवासनसँगै आर्थिक असमानता, रोजगारी र जनसंख्या वृद्धावस्थामा पुग्दै गएको विषय पनि निर्वाचनका प्रमुख मुद्दा थिए ।

राज्यमा दक्ष कामदारको अभाव बढ्दै गएको छ । घट्दो जन्मदर र वृद्ध जनसंख्याका कारण श्रम बजारमा समस्या देखिएको छ । रोयटर्सका अनुसार आप्रवासी पृष्ठभूमिका करिब ५० हजार मानिस मेक्लेनबर्ग–फोरपोमर्नमा काम गर्छन् । उनीहरू राज्यको अर्थतन्त्रमा महत्वपूर्ण योगदान गरिरहेका छन् ।

एक्जिट पोलमा एसपीडी भने एएफडीभन्दा थोरै पछाडि ३६.५ प्रतिशत मतसहित दोस्रो स्थानमा देखिएको छ । एसपीडीकी मानुएला स्वेसिग सन् २०१७ देखि राज्यकी प्रमुखका रूपमा कार्यरत छिन् ।

बर्लिनमा आवास मुख्य चुनावी मुद्दा

बर्लिनको निर्वाचनमा भने आवासको बढ्दो मूल्य र घरको अभाव प्रमुख मुद्दा बनेको थियो । राजधानीमा पछिल्लो एक दशकमा घरभाडा निरन्तर बढेको र आगामी वर्षहरूमा पनि आवास अभाव गम्भीर बन्ने अनुमान गरिएको छ ।

दुई राज्यको निर्वाचन परिणामले जर्मनीको राजनीतिक परिदृश्यमा दक्षिणपन्थी एएफडीको बढ्दो प्रभावसँगै परम्परागत मुख्यधाराका दलमाथि बढिरहेको दबाबलाई समेत उजागर गरेको छ ।