सौरभ चौधरीले विराटनगरबाट थाले ‘द राइज अफ साम्राज्य’ को छायांकन

News Summary

Generated by OK AI. Editorially reviewed.

निर्देशक सौरभ चौधरीको फिल्म ‘द राइज अफ साम्राज्य’को छायांकन विराटनगरमा शुभमुहूर्तसँगै ७० दिनको तालिकामा सुरू भएको छ।
एपिक एक्सन ड्रामाका रूपमा बन्ने फिल्मको अधिकांश छायांकन पूर्वी नेपालका विभिन्न स्थानमा गरिनेछ।
फिल्ममा सौगात मल्ल, दयाहाङ राई, नाजिर हुसेन, विजय बराल, अञ्जना बराइली, सुशील श्रेष्ठ र अमरप्रताप श्रेष्ठ प्रमुख भूमिकामा देखिँदैछन्।

काठमाडौं । निर्देशक सौरभ चौधरीको आगामी फिल्म ‘द राइज अफ साम्राज्य’को छायांकन सुरु भएको छ । विराटनगरमा शुभमुहूर्त गर्दै छायांकन थालिएको हो ।

यो फिल्मलाई उनले यसपटक अझ ठूलो क्यानभासमा निर्माण गर्न लागेको बताएका छन् । एपिक एक्सन ड्रामाका रूपमा निर्माण हुने बताइएको फिल्मको छायांकनका लागि ७० दिनको तालिका तय गरिएको छ । अधिकांश छायांकन पूर्वी नेपालका विभिन्न स्थानमा गरिनेछ ।

फिल्ममा सौगात मल्ल, दयाहाङ राई, नाजिर हुसेन, विजय बराल, अञ्जना बराइली, सुशील श्रेष्ठ र अमरप्रताप श्रेष्ठ प्रमुख भूमिकामा देखिँदैछन् ।

फिल्ममा सौगातले निर्वाह गर्ने चरित्र चुनौतीपूर्ण हुने जनाइएको छ । यसमा उनले २५ वर्षको जवानदेखि ८० वर्षको वृद्धसम्मको जीवन यात्रा प्रस्तुत गर्ने निर्देशकले बताएका छन् । एउटै पात्रको लामो उमेर अन्तरलाई अभिनयमार्फत देखाउनु सौगातका लागि समेत महत्वपूर्ण चुनौती बन्नेछ ।

यो फिल्म निर्देशक चौधरीको दयाहाङसँग पहिलो सहकार्य समेत हुनेछ । सुशीलसँग पनि सौरभको करिब ६ वर्षपछि पुनर्मिलन भएको छ । उनीहरूले यसअघि सौरभकै पहिलो निर्देशकीय चलचित्र ‘लभ डायरीज’मा सहकार्य गरेका थिए ।

‘द राइज अफ साम्राज्य’को पटकथा चर्चित उपन्यासकार बुद्धिसागरले लेखेका हुन् । डार्क हर्स इन्टरटेन्मेन्टको ब्यानरमा निर्माण हुने फिल्मलाई नेपाली सिनेमाकै ठूलो स्केलको एक्सन चलचित्र बनाउने निर्माण पक्षको दाबी छ ।

प्रवेश चौधरी र निलादेव निर्माता रहेको फिल्ममा विश्वास बस्नेत सह-निर्माता तथा शंकर पाण्डे कार्यकारी निर्माता छन् ।