बीपी राजमार्ग पूर्णरुपमा अवरुद्ध

News Summary

Generated by OK AI. Editorially reviewed.

अविरल वर्षापछि खसेको पहिरो र लेदोले काभ्रेपलाञ्चोक खण्डको बीपी राजमार्ग नमोबुद्ध–६, रोशी–७, रोशी–८ र रोशी–११ मा पूर्णरूपमा अवरुद्ध भएको छ।
इलाका प्रहरी कार्यालय मंगलटारकी प्रमुख प्रहरी निरीक्षक निकिता कुमारी मिश्राका अनुसार वर्षा भइरहेकाले पहिरो हटाउन समय लाग्ने छ।
पनौती हुँदै बग्ने रोशी खोलाको जलसतह सतर्कता तह पार गरेर बढ्दो क्रममा रहेकाले प्रशासनले तल्लो तटीय र डुबान भइरहने क्षेत्रमा सतर्कता अपनाउन आग्रह गरेको छ।

९ असोज, काभ्रेपलाञ्चोक । अविरल बर्षापछि आएको पहिरो र लेदोले काभ्रेपलाञ्चोक खण्डको विभिन्न स्थानमा बीपी राजमार्ग पूर्णरुपमा अवरुद्ध भएको छ ।

इलाका प्रहरी कार्यालय मंगलटारका प्रमुख प्रहरी निरीक्षक निकिता कुमारी मिश्राका अनुसार बीपी राजमार्गको नमोबुद्ध–६ को चौकीडाँडा, रोशी–७ को चारसयवेशी, रोशी–८ को गिम्दीवेशी र रोशी ११ माम्तीमा पहिरो खसेकाले बीपी राजमार्ग पूर्णरुपमा अवरुद्ध भएको हो ।

उनका अनुसार वर्षा भइरहेकाले पहिरो हटाउन समय लाग्ने छ । त्यसैले यात्रुहरूलाई सडकको अवस्थाबारे जानकारी लिएर मात्र यात्रा गर्न प्रहरीले अनुरोध गरेको छ ।

त्यस्तै काभ्रेपलाञ्चोकको पनौती हुँदै बग्ने रोशी खोलामा पनौती जलमापन केन्द्रको जलसतहले सतर्कता तह पार गरेको र बढ्दो क्रममा रहेकाले तल्लो तटीय तथा डुबान भइरहने क्षेत्रहरुमा सतर्कता अपनाउन प्रशासनले अनुरोध गरेको छ ।

प्रमुख जिल्ला अधिकारी गोपालकुमार अधिकारीका अनुसार बाढी पूर्वानुमान महाशाखाबाट प्राप्त सूचना अनुसार पनौतीमा रोशी खोलाले सतर्कता तह पार गरेको हो ।