२०८३ असोज १५ गते ७:३० 
१५ असोज, काठमाडौं । पोर्चुगलका स्टार खेलाडी क्रिस्टियानो रोनाल्डोले डेनमार्कविरुद्धको यूईएफए नेसन्स लिग खेलअघि राष्ट्रिय टोलीको प्रशिक्षण क्याम्प छाडेका छन् ।
रोनाल्डोले बुधबार सामाजिक सञ्जालमार्फत आफूले राष्ट्रिय टोलीको क्याम्प छाड्ने निर्णय गरेको जानकारी दिएका हुन् । प्रशिक्षक जर्ज जेसुसले बिहीबार कोपनहेगनमा हुने खेलमा रोनाल्डोलाई सुरुआती टोलीमा नराख्ने बताएका केही समयपछि उनले क्याम्प छाडेका हुन् ।
रोनाल्डोले पोर्चुगल फुटबल महासंघका अध्यक्षसँग कुराकानी गरेपछि क्याम्प छाड्ने निर्णय गरेको बताएका छन् । उनले आफूले क्याम्प छाड्नुको कारण उचित समयमा सार्वजनिक गर्ने बताएका छन् ।
४१ वर्षीय रोनाल्डो पुरुष अन्तर्राष्ट्रिय फुटबलमा सर्वाधिक गोल गर्ने खेलाडी हुन् । उनले पोर्चुगलका लागि १४६ गोल गरिसकेका छन् र व्यावसायिक करिअरमा १ हजार गोल पूरा गर्ने लक्ष्यमा छन् ।
रोनाल्डोले आइतबार नर्वेविरुद्ध पोर्चुगलको २–१ को जितमा खेलेका थिएनन् । त्यसयता उनले टोलीसँग प्रशिक्षण पनि गरेका थिएनन् । यसले प्रशिक्षक जेसुससँग उनको सम्बन्धबारे विभिन्न चर्चा सुरु भएको थियो ।
प्रशिक्षक जेसुसले भने रोनाल्डोसँग कुनै समस्या नरहेको बताएका छन् । उनले टोलीका सबै खेलाडीका लागि नियम समान रहेको र खेलाडीको अन्तिम निर्णय प्रशिक्षकले गर्ने बताए ।
जेसुसका अनुसार डेनमार्कविरुद्ध गोन्सालो रामोसले सुरुआत गर्नेछन् । तर खेलको परिस्थितिअनुसार आवश्यक परे रोनाल्डोलाई मैदानमा उतार्न सकिने उनले बताएका थिए ।
नर्वेविरुद्धको खेलमा रोनाल्डोलाई लामो समय वार्मअप गराएर पनि मैदानमा नउतारेको विषयमा आफूले गल्ती गरेको जेसुसले स्वीकार गरेका छन् । उनले यस्तो अवस्थामा कुनै पनि खेलाडी निराश हुन सक्ने बताए ।
पोर्चुगल फुटबल महासंघले पनि रोनाल्डोले प्रशिक्षण क्याम्प छाडेको पुष्टि गर्दै बाँकी २४ खेलाडीसहित टोलीको तयारी जारी रहने जनाएको छ ।
नेसन्स लिगको समूह ‘ए ४’ मा पोर्चुगल दुई खेलबाट ६ अंकसहित शीर्ष स्थानमा छ । डेनमार्क र नर्वेको समान तीन अंक छ भने वेल्सले अंक जोड्न सकेको छैन। पोर्चुगलले आइतबार नर्वेसँग पनि खेल्नेछ ।
रोनाल्डोको क्याम्पबाट बाहिरिने निर्णय हालको अन्तर्राष्ट्रिय ब्रेकभरि मात्र हो वा त्यसपछिसम्म कायम रहने हो भन्ने स्पष्ट भइसकेको छैन ।
-ईएसपीएनबाट
प्रतिक्रिया 4