पोशाक खरिदबारे पूर्वाग्रहभन्दा माथि उठेर अध्ययन गर्छौं : सांसद ओली

२१ असोज, काठमाडौं । राष्ट्रिय प्रजातन्त्र पार्टीकी प्रमुख सचेतक खुश्बु ओलीले निर्वाचन प्रहरीको पोशाक खरिद प्रक्रियाबारे राजनीतिक आग्रह–पूर्वाग्रहभन्दा माथि उठेर निष्पक्ष रूपमा अध्ययन गर्ने बताएकी छिन् ।

बुधवार सिंहदरबारमा बसेको निर्वाचन प्रहरी, नेपाल प्रहरी र सशस्त्र प्रहरी बल, नेपालको पोशाक खरिदसम्बन्धी अध्ययन उपसमितिको बैठकपछि सञ्चारकर्मीहरुसँग कुरा गर्दै उनले यस्तो बताएकी हुन् ।

निर्वाचन प्रहरीको पोशाक खरिद प्रक्रियासम्बन्धी उजुरी सार्वजनिक लेखा समितिमा परेको र बेनामी उजुरी पनि पर्न सक्ने भएकाले त्यसलाई अध्ययन गर्नु समितिको जिम्मेवारी भएको उनले बताइन् । उपसमितिको काम छानबिन वा कारबाही गर्ने नभइ तथ्य र कागजातका आधारमा अध्ययन गरी प्रतिवेदन र आवश्यक सिफारिस पेश गर्नु रहेको बताइन् ।

‘निर्वाचन प्रहरीको पोशाक खरिद प्रक्रियासम्बन्धी उजुरी सार्वजनिक लेखा समितिमा परेको छ । बेनामी उजुरी पनि पर्न सक्ने भएकाले त्यसलाई अध्ययन गर्नु समितिको जिम्मेवारी हो । यही उद्देश्यले हामीले अध्ययन उपसमिति गठन गरेका हौँ । उपसमितिको काम छानबिन वा कारबाही गर्ने होइन, तथ्य र कागजातका आधारमा अध्ययन गरी प्रतिवेदन र आवश्यक सिफारिस पेश गर्ने हो,’ उनले भनिन् ।

सार्वजनिक खरिद ऐन तथा प्रचलित कानूनअनुसार खरिद प्रक्रिया भए–नभएको अध्ययन गरिने उनले बताइन् । उजुरी पर्नु नै कसैलाई दोषी ठहर गर्नु नभएको बताउँदै ओलीले उजुरीलाई तथ्य, प्रमाण र कानूनी प्रक्रियाका आधारमा अध्ययन गर्नुपर्ने उनको तर्क थियो ।

‘सार्वजनिक खरिद ऐन तथा प्रचलित कानूनअनुसार खरिद प्रक्रिया भए–नभएको अध्ययन गरिनेछ । यस विषयमा व्यक्तिगत धारणा वा राजनीतिक आग्रह–पूर्वाग्रहभन्दा माथि उठेर निष्पक्ष रूपमा अध्ययन गर्नेछौँ । फरक मत हुनसक्छ तर समितिको बैठकमा सबैका धारणा सम्मानपूर्वक राखिनेछन् र निर्णय प्रक्रियाबाटै निष्कर्षमा पुगिनेछ,’ उनले भनिन्, ‘उजुरी पर्नु नै कसैलाई दोषी ठहर गर्नु होइन । भविष्यमा जोसुकै व्यक्ति वा निकायविरुद्ध उजुरी पर्न सक्छ । त्यसैले प्रत्येक उजुरीलाई तथ्य, प्रमाण र कानूनी प्रक्रियाका आधारमा अध्ययन गर्नुपर्छ । हाम्रो जिम्मेवारी स्पष्ट छ,विधिको शासन, कानूनको पालना र निष्पक्ष अध्ययन । कागजात तथा तथ्यको अध्ययनपछि जे देखिन्छ, त्यही आधारमा प्रतिवेदन र सिफारिस गर्नेछौँ ।’