पोखरा विमानस्थलमा न्यून भिजिबिलिटीमा पनि उडान-अवतरण सहज बनाउने प्रक्रिया अघि बढ्यो

२९ असोज, काठमाडौं । पोखरा अन्तर्राष्ट्रिय विमानस्थलमा प्रतिकूल मौसम र कम भिजिबिलिटीका कारण हुने उडान अवरोध घटाउन आवश्यक नेभिगेसन प्रणाली कार्यान्वयनको प्रक्रिया अघि बढाइएको छ ।

नेपाल नागरिक उड्डयन प्राधिकरणले पोखरा विमानस्थलमा आवश्यक नेभिगेसन कार्यसम्पादन तथा पूर्वस्वीकृति अवतरण प्रक्रिया लागू गर्न प्राविधिक अध्ययन अघि बढाएको हो ।

पर्यटनमन्त्री खडकराज पौडेल (गनेस) ले पनि यसबाट प्रतिकूल मौसमका कारण हुने उडान अवरोध, अन्य विमानस्थलतर्फ मोड्नुपर्ने अवस्था र उडान रद्द हुने घटना घटाउन सहयोग पुग्ने अपेक्षा गरेको बताएका छन् ।

‘पोखरा अन्तर्राष्ट्रिय विमानस्थलमा आरएनपी–एआर अवतरण प्रक्रिया कार्यान्वयनको प्रक्रिया अघि बढेको छ। यसबाट प्रतिकूल मौसम र कम भिजिबिलिटीका कारण हुने उडान अवरोध, डाइभर्सन तथा रद्द हुने उडान घटाउन सहयोग पुग्ने अपेक्षा गरिएको छ,’ उनले सामाजिक सञ्जालमा लेखेका छन् ।

उनका अनुसार यो पोखराको हवाई सेवालाई थप सुरक्षित, नियमित र विश्वसनीय बनाउने दिशामा महत्त्वपूर्ण कदम हो ।

प्राधिकरणका अनुसार पोखरा विमानस्थलमा हाल भीओआर/डीएमई र आईएलएस प्रणालीमा आधारित उडान अवतरण प्रक्रिया सञ्चालनमा छ । विमानस्थलको भौगोलिक अवस्थिति, आसपासका पहाडी भूभाग तथा प्राविधिक र सञ्चालनसम्बन्धी सीमितताका कारण प्रतिकूल मौसम र कम भिजिबिलिटीमा उडान सञ्चालन चुनौतीपूर्ण हुने गरेको छ ।

यही समस्या सम्बोधन गर्न प्राधिकरणले भूउपग्रहमा आधारित नेभिगेसन प्रणाली कार्यान्वयनलाई प्राथमिकता दिएको जनाएको छ । पोखरा विमानस्थलमा आरएनपी–एआर प्रक्रियासम्बन्धी प्रारम्भिक अध्ययन पूरा भइसकेको प्रेस विज्ञप्तिमा उल्लेख छ ।

तर, उक्त प्रक्रिया सञ्चालनमा ल्याउन विस्तृत प्रक्रिया डिजाइन, प्रमाणीकरण, सुरक्षा मूल्याङ्कन तथा प्रचलित नियामकीय मापदण्डअनुसार आवश्यक स्वीकृति लिनुपर्नेछ । यी प्रक्रिया पूरा भएपछि कम भिजिबिलिटीमा उडान सञ्चालन गर्न आवश्यक न्यूनतम भिजिबिलिटी सीमा घटाउन सकिने सम्भावना रहेको प्राधिकरणले जनाएको छ ।

यसबाट प्रतिकूल मौसमका कारण हुने उडान अन्यत्र मोड्नुपर्ने, अवतरण प्रयास सफल नहुने र उडान रद्द गर्नुपर्ने अवस्था घट्ने अपेक्षा गरिएको छ । साथै यात्रुलाई थप भरपर्दो हवाई सेवा उपलब्ध गराउन सहयोग पुग्ने प्राधिकरणको विश्वास छ ।

प्राधिकरणले आधुनिक प्रविधिमा आधारित हवाई नेभिगेसन प्रणालीको विकास र कार्यान्वयनमार्फत पोखरा विमानस्थलको उडान सेवालाई सुरक्षित, नियमित र प्रभावकारी बनाउने लक्ष्य राखेको जनाएको छ ।