करिश्माको बोल्ड ड्रेसमा सलमानको आपत्ति, भनेका थिए, ‘म सुटिङ गर्दिनँ’

काठमाडौं । बलिउडमा सलमान खानका अनेक किस्सा चर्चित छन् । कहिले आफ्नै शैलीका कारण त कहिले सहकर्मी कलाकारसँगको रमाइलो नोकझोंकका कारण उनी चर्चामा आइरहन्छन् ।

यस्तै, अभिनेत्री करिश्मा कपुरसँग जोडिएको एउटा पुरानो प्रसंग फेरि चर्चामा आएको छ, जहाँ करिश्माको पहिरन देखेपछि सलमानले उनीसँग सुटिङ गर्नै अस्वीकार गरेका थिए ।

निर्देशक करण जौहरको चर्चित टक शो ‘कफी विद करण’ मा सलमान र करिश्माले सँगै बसेर ९० को दशकका पुराना सम्झना ताजा गरेका थिए । कुराकानीका क्रममा करिश्माले सन् २००० मा प्रदर्शनमा आएको फिल्म ‘दुल्हन हम ले जाएंगे’ को छायांकन गर्दाको एउटा रोचक घटना सुनाइन् ।

करिश्माका अनुसार उनी फिल्मका गीतमा लगाउने पहिरन र आफ्नो लुक्सलाई लिएर निकै उत्साहित हुन्थिन् । त्यही क्रममा एउटा गीतका लागि उनले शरीरमा टम्म मिल्ने फेसनेबल पहिरन रोजेकी थिइन् ।

आफू उक्त पहिरनमा निकै राम्री देखिने उनको विश्वास थियो । तर, सलमानको प्रतिक्रिया भने उनले सोचेभन्दा फरक आयो । करिश्माले सम्झिइन्, सलमानले पहिरन देख्नेबित्तिकै भनेका थिए, ‘यो के लगाएको ? यस्तो कपडा लगाउँछौ भने तिमीसँग म सुटिङ नै गर्दिनँ ।’

सलमानले सुटिङ गर्न अस्वीकार गरेपछि करिश्मा निर्देशक डेभिड धवनकहाँ पुगेकी थिइन् । उनले सलमानले आफूलाई मन परेको पहिरन लगाउन नदिएको भन्दै गुनासो गरिन् ।

कार्यक्रमका प्रस्तोता करणले पनि यही प्रसंगमा ठट्टा गर्दै सलमानलाई करिश्माको पहिरन धेरै खुला भएकोमा आपत्ति थियो कि भनेर सोधे ।

करिश्माले हाँस्दै उक्त पहिरन शरीरमा टम्म मिल्ने र फिटेड रहेको स्वीकार गरिन् । तर, सलमान आफूलाई लिएर निकै चिन्ता गर्ने र एक दाजु वा मिल्ने साथीले जस्तै सल्लाह दिने गरेको पनि उनले बताइन् ।

करिश्माको कुरा सुनेपछि सलमानले पनि आफ्नो कुरा राखे । उनका अनुसार पहिरन शरीरमा टम्म मिल्ने मात्रै नभई निकै छोटो र पारदर्शीसमेत थियो ।
उनले ठट्टा गर्दै हरेक टेकअघि करिश्मालाई पहिरन अलिकति तल तान्न भनिरहने गरेको सुनाए ।

सलमान र करिश्मा ९० को दशकका बलिउडका चर्चित अनस्क्रिन जोडीमध्ये एक थिए ।

उनीहरूले सँगै ११ फिल्ममा काम गरेका छन् । पर्दामा उनीहरूको केमेस्ट्री जति चर्चित थियो, पर्दापछाडिका यस्ता रमाइला किस्साले पनि उनीहरूको सम्बन्ध र सहकार्यलाई सम्झनलायक बनाउँछन् ।