आनीको नियुक्ति बदरको माग गर्ने लुम्बिनी बचाउ महाअभियानका संयोजकसहित दुई जना पक्राउ

१० कात्तिक, बुटवल । लुम्बिनी विकास कोषको नवनियुक्त उपाध्यक्ष आनी छोइङ डोल्माको नियुक्ति बदरको माग गर्दै आन्दोलन गरिरहेको लुम्बिनी बचाउ महाअभियानका संयोजक अकरम खान सहित दुईजना पक्राउ परेका छन् ।

प्रहरीले मध्यराति लुम्बिनी पर्साचोकस्थित घरमा सुतिरहेको अवस्थामा ६१ वर्षीय संयोजक खान र लुम्बिनी सांस्कृतिक नगरपालिका ९ का ३३ वर्षीय वाविउद्दिन मुसलमानलाई पक्राउ गरेर लगेको अभियानका सहसंयोजक रामविकास चौधरीले जानकारी दिए ।

शान्तिपूर्णरुपमा आफ्ना माग राखेर आन्दोलन गरेको आधारमा प्रहरीले मध्यरातमा धरपकड गरेको भन्दै महाअभियानले दुबै जनालाई नि:शर्त रिहाइको माग गरेको छ ।

जिल्ला प्रहरी कार्यालय रुपन्देहीले दुबैजनाको पक्राउको पुष्टी गर्दै सार्वजनिक स्थानमा ‘उच्छृंखल गतिविधि’ गरेको आरोपमा अनुसन्धानका लागि पक्राउ गरेर जिल्ला प्रहरी कार्यालय भैरहवामा राखिएको जनाएको छ ।

महाअभियानले आनीको नियुक्ति बदर गरी स्थानीय योग्य व्यक्तिलाई कोषमा नियुक्ति गर्न माग गर्दै चरणबद्ध आन्दोलन गरिरहेको छ । आन्दोलन अन्तर्गत महाअभियानले सोमबार दिउँसो पर्साचोकमा संस्कृति तथा  पर्यटन मन्त्री गनेश पौडेलको पुत्ला दहनसमेत गरेको थियो ।

कोषको उपाध्यक्षमा आवेदन नै नदिएकी आनी छोइङलाई नियुक्ति दिइएको भन्दै लुम्बिनी बचाउ महाअभियानसँगै कपिलवस्तु तिलौराकोट संघर्ष समिति, लुम्बिनीवासी प्रदेश सांसद र पूर्व मन्त्री चन्द्रकेश गुप्ता, वरिष्ठ अधिवक्ता दिनेश त्रिपाठी, राष्ट्रिय जेनजी नागरिक अभियान लगायतले विरोध गर्दै आएका छन् ।

उनीहरुले आनीमाथि वंशजको नागरिकता प्राप्ति र उनले हङकङबाट प्राप्त गरेको भनिएको करोडौं रकमको वैधता र पारदर्शितामाथि पनि प्रश्न उठाएका छन् । आनीमाथि उठेका विषयमा निष्पक्ष छानबिन गरेर निर्दोष सावित भए मात्र नियुक्ति स्वीकार्य हुने उनीहरुको माग छ ।