इजरायलको एक्जिट पोल : नेतान्याहुको सत्ता संकटमा, विपक्षी पनि बहुमतबाट टाढा

११ कात्तिक, काठमाडौं । इजरायलमा सोमबार भएको आम निर्वाचनपछिका प्रारम्भिक एक्जिट पोलले बेन्जामिन नेतान्याहुको गठबन्धन र गादी आइजेन्कोट नेतृत्वको विपक्षी गठबन्धनले स्पष्ट बहुमत नपाउने सम्भावना देखिएको छ ।

प्रारम्भिक एक्जिट पोलले नेतान्याहुको सत्ता निरन्तरतामाथि प्रश्न उठाए पनि अन्तिम परिणाम भने आइसकेको छैन ।

आधिकारिक मतगणना अघि बढ्दै जाँदा सिटको अनुमान फेरिन सक्ने भएकाले आगामी सत्ता समीकरणबारे अहिले नै निष्कर्ष निकाल्न सकिने अवस्था भने छैन ।

एक्जिट पोलमा के छ ?

इजरायली समाचार संस्था कान ११ र च्यानल १३ ले सार्वजनिक गरेका पछिल्ला एक्जिट पोलअनुसार दुवै गठबन्धनले ५१–५१ सिट जित्ने अनुमान गरिएको छ ।

च्यानल १२ को संशोधित एक्जिट पोलमा भने आइजेन्कोट नेतृत्वको गठबन्धनले ५० र नेतान्याहुको गठबन्धनले ५२ सिट जित्ने अनुमान छ ।

इजरायलको संसद् नेसेटमा बहुमतको सरकार बनाउन १२० मध्ये कम्तीमा ६१ सिट आवश्यक पर्छ । त्यसैले एक्जिट पोलको अनुमान अनुसार कुनै पनि गठबन्धनले एक्लै सरकार गठन गर्न सक्ने अवस्था देखिएको छैन ।

एक्जिट पोलका अनुमान आधिकारिक मतगणनाका परिणाम होइनन् । सञ्चारमाध्यमले मतदान केन्द्रबाट बाहिरिएका मतदातासँग गरेको सर्वेक्षणका आधारमा एक्जिट पोल तयार गरिएका हुन् ।

यदि एक्जिट पोलको अनुमान मिलेमा दुवै गठबन्धनले नयाँ सरकार गठनका लागि बहुमत पुर्‍याउन साना दलहरूको समर्थन खोज्नुपर्ने छ ।

मतगणना सुरु

इजरायलको केन्द्रीय निर्वाचन समितिका अनुसार मतदान सकिएपछि आधिकारिक मतगणनाको प्रारम्भिक विवरण आउन थालेको छ ।

सुरुवाती चरणमा २ हजार ६७० मत गणना भएको थियो, जुन कुल मतको करिब ०.१ प्रतिशत हो ।

पछिल्लो विवरणमा गणना भएको मत २.५ प्रतिशत पुगेको जनाइएको छ ।

यो समाचार तयार पार्दासम्म गणनाको नतिजा सार्वजनिक भएको छैन ।

नेतान्याहुका लागि ‘निकै खराब संकेत’

द इकोनोमिस्टका इजरायल संवाददाता एन्सेल फेफरले प्रारम्भिक परिणामलाई नेतान्याहुको गठबन्धनका लागि निकै खराब संकेतका रूपमा व्याख्या गरेका छन् ।

एक्जिट पोलमा नेतान्याहुको लिकुड पार्टी सबैभन्दा ठूलो दल बन्ने अनुमान भए पनि त्यसले समग्र गठबन्धनको सत्ता समीकरणमा खासै राहत नदिने उनको विश्लेषण छ ।

फेफरका अनुसार हालको अनुमानले सरकार गठन गर्ने सम्भावनामा नेतान्याहुलाई कमजोर अवस्थामा देखाएको छ ।

यद्यपि, केन्द्रवादी दलहरूलाई समेटेर राष्ट्रिय एकताको सरकार बनाउने प्रयास गरेमा उनले पुनरागमन गर्न सक्ने सम्भावना भने पूर्णरूपमा नकार्न नसकिने उनको भनाइ छ ।

यसअघि पनि राजनीतिक संकटबाट पुनरागमन गरेका नेतान्याहुका लागि यसपटकको परिणामले सरकार गठनको बाटो कठिन बनाउन सक्ने देखिएको छ ।

आइजेन्कोटले भने– जनताले परिवर्तन रोजे

विपक्षी नेता गादी आइजेन्कोट आफ्नो पार्टी याशरको मुख्यालयमा समर्थकहरूलाई सम्बोधन गर्दै निर्वाचनको परिणामले परिवर्तनको पक्षमा जनमत देखाएको दाबी गरेका छन् ।

‘हामीले इतिहास बनाएका छौँ,’ उनले भने, ‘इजरायली जनताले आगामी वर्षहरूको नेतृत्वका विषयमा निर्णय गरे । जनताले परिवर्तनको पक्षमा निर्णय गरेका छन् ।’

यो पनि पढ्नुहोस

को हुन् नेतान्याहुलाई चुनौती दिने आइजेनकोट ?

उनले निर्वाचनमा जनताले नेतान्याहुको कार्यकाललाई निरन्तरता नदिने निर्णय गरेको दाबी पनि गरे । आइजेन्कोटले जनमतको सम्मान गर्नु आफ्नो व्यक्तिगत र राजनीतिक जिम्मेवारी भएको पनि बताए ।

अरब समुदायको मतदानमा वृद्धि

प्रारम्भिक एक्जिट पोलले अरब राजनीतिक दलहरूको प्रदर्शन र मतदान सहभागितामा उल्लेख्य वृद्धि भएको संकेत गरेका छन् ।

इजरायलको कुल मतदातामध्ये अरब समुदायको हिस्सा करिब पाँच भागको एक भाग छ । अघिल्लो निर्वाचनमा यो समुदायका आधाभन्दा केही बढी मतदाताले मात्रै मतदान गरेका थिए ।

अरब समुदायमा मतदानका लागि अभियान चलाएका २९ वर्षीय वकिल महदी कबाहाले यसपटकको सहभागितालाई ऐतिहासिक बताएका छन् ।

‘अरब समाज मतदानमा सहभागी भयो र हामी यहाँ छौँ, निर्णय प्रक्रियाको हिस्सा हौँ भन्ने स्पष्ट सन्देश दियो,’ उनले भने ।

अरब समुदायका मतदातामाझ आपराधिक गतिविधि नियन्त्रण, सुरक्षा व्यवस्था र प्रहरीको प्रभावकारिता प्रमुख चासोका विषय रहेका छन् । कबाहाले अरब समुदायलाई आफ्नो मताधिकार प्रयोग गरी सरकारको दिशा निर्धारण गर्न आग्रह गर्दै आएका थिए ।

उनका अनुसार मतदानमार्फत अति दक्षिणपन्थी नेताहरू इतामार बेन–गभिर र बेजालेल स्मोट्रिचजस्ता मन्त्रीहरूको राजनीतिक प्रभाव कम गर्ने अवसर पनि मतदाताले खोजेका छन् ।

यो पनि पढ्नुहोस

इजरायलमा वामपन्थ र दक्षिणपन्थको अर्थ के हो ? विपक्षी को हो ?