जाडोमा एसी लामो समय बन्द राख्दै हुनुहुन्छ ? ५ कुरामा दिनुहोस् ध्यान

जाडो मौसम सुरु भएसँगै एसीको प्रयोजन ठाउँअनुसार फरक पर्न सक्छ । गर्मी ठाउँ छ भने गर्मीमा दिनरात चल्ने एसी अब धेरै महिनासम्म बन्द अवस्थामा रहन्छ । यदि जाडो ठाउँ छ भने यसको प्रयोग निरन्तर रहन सक्छ ।

तर पनि जाडोको समयमा धेरैजसो एसीहरू प्राय बन्द अवस्थामै राखिन्छ ।

जाडोमा एसीलाई लामो समयसम्म बन्द राख्नुअघि यसको उचित हेरचाह गर्नु अत्यन्तै आवश्यक हुन्छ ।

यदि तपाईंले सफाइ र मर्मतसम्भार नगरी एसी बन्द गर्नुभयो भने अर्को गर्मीमा यसलाई पुनः सञ्चालन गर्दा कूलिङको समस्या, दुर्गन्ध वा प्राविधिक खराबीको सामना गर्नुपर्ने हुन सक्छ । त्यसैले गर्मीमा एसी राम्रो अवस्थामा सञ्चालन होस् भन्नका लागि बन्द गर्नुअघि केही कुरामा ध्यान दिनु आवश्यक छ ।

१.एयर फिल्टर राम्ररी सफा गर्ने

एसीलाई लामो समयसम्म बन्द राख्नुअघि यसको एयर फिल्टर सफा गर्नु सबैभन्दा महत्त्वपूर्ण काममध्ये एक हो । गर्मीमा निरन्तर प्रयोग हुँदा फिल्टरमा धुलो, माटो तथा अन्य कणहरू जम्मा हुन्छन् । यदि यी कणहरू सफा नगरी छोडियो भने मेसिनभित्र फोहोर जमिरहन सक्छ र अर्को पटक प्रयोग गर्दा समस्या हुन सक्छ ।

यसका लागि सबैभन्दा पहिले एसी बन्द गरी यसको विद्युत् आपूर्ति काट्नुहोस् । त्यसपछि कम्पनीको म्यानुअलमा दिइएका निर्देशनअनुसार फिल्टर निकालेर सफा गर्नुहोस् ।

२.एसीको इनडोर र आउटडोर युनिट सफा गर्ने

स्प्लिट एसीमा दुईवटा युनिट हुन्छन्– इनडोर र आउटडोर । गर्मीमा एसी प्रयोग गर्दा यी दुवै युनिटमा धुलो जम्न सक्छ । त्यसैले जाडोमा एसी बन्द गर्नुअघि यी दुवैको सफाइ गर्नुपर्छ ।

इनडोर युनिटको बाहिरी भागलाई सुक्खा वा हल्का भिजेको नरम कपडाले सफा गर्नुहोस् । त्यस्तै, आउटडोर युनिटको वरिपरि जम्मा भएका पात, धुलो तथा फोहोर हटाउनुहोस्, ताकि त्यहाँ हावाको आवतजावत सहज रूपमा भइरहोस् ।

३.एसीको ड्रेनेज पाइप अनिवार्य रूपमा जाँच गर्ने

एसी प्रयोग गर्दा निस्कने पानी ड्रेनेज पाइपमार्फत बाहिर जान्छ । यदि यस पाइपमा फोहोर, ढुसी वा अन्य धुलो जम्मा भयो भने पानीको निकासमा समस्या हुन सक्छ।

एसीलाई लामो समयसम्म बन्द राख्नुअघि ड्रेनेज पाइप र यसको वरिपरिको भाग जाँच गर्नुपर्छ । यदि पाइपमा पानी जमेको छ, पानी चुहिएको देखिन्छ वा दुर्गन्ध आइरहेको छ भने प्राविधिकबाट जाँच गराउनुहोस् ।

४.एसी बन्द गर्नुअघि ड्राई मोड प्रयोग गर्ने

एसीको इनडोर युनिटमा ओसिलोपन रहिरह्यो भने लामो समयसम्म बन्द अवस्थामा रहँदा दुर्गन्ध वा ढुसी लाग्ने समस्या हुन सक्छ । त्यसैले एसीमा ड्राई वा सेल्फ-क्लिन सुविधा उपलब्ध छ भने कम्पनीको निर्देशनअनुसार यसको प्रयोग गर्नुहोस् । केही एसीमा सेल्फ-क्लिन, कोइल ड्राई वा फ्यान-अनलीजस्ता सुविधा हुन्छन्, जसले युनिटभित्रको ओसिलोपन कम गर्न मद्दत गर्न सक्छन् ।

५.एसीलाई कभर गर्नुअघि विद्युत् आपूर्ति बन्द गर्ने

एसीको सफाइ र आवश्यक जाँच पूरा भएपछि लामो समयसम्म बन्द राख्न यसको विद्युत् आपूर्ति बन्द गर्नुहोस् । रिमोटबाट एसी बन्द गरेपछि आवश्यकताअनुसार यसको छुट्टै इलेक्ट्रिकल आइसोलेटरको विद्युत् आपूर्ति पनि बन्द गर्नुहोस् ।

विद्युत् प्यानलबारे जानकारी छैन भने इलेक्ट्रीसियनको सहयोग लिनुहोस् । एसीलाई कभर गर्दा आउटडोर युनिटको आवश्यक भागमा मात्र कभर लगाउनुहोस् । इनडोर युनिट वा पूरै एसीलाई हावा नछिर्ने गरी प्लास्टिकले नछोप्नुहोस् ।

जाडोमा एसीको मर्मतसम्भारका लागि के गर्ने ?

– यदि एसीलाई धेरै महिनासम्म प्रयोग गर्ने योजना छैन भने रिमोटको ब्याट्री निकालेर छुट्टै राख्ने

– एसीको वरिपरि सामान थुपारेर नराख्ने, विशेषगरी आउटडोर युनिटको नजिक सामान राख्दा हावाको आवतजावत रोकिन सक्छ ।

– अर्को गर्मीमा एसी सञ्चालन गर्नुअघि यसको फिल्टर, वायरिङ र युनिटको अवस्था जाँच गराउनुहोस् ।